ރާއްޖެއިން ކޮވިޑް ޖެހުނު މީހުންގެ ތެރެއިން 83 ޕަސެންޓު މީހުން ރަނގަޅު ވެއްޖެ، ނިޔާވީ 0.49 ޕަސެންޓް މީހުން!
ރާއްޖޭގައި ކޮވިޑް-19 އަށް ފައްސިވި މީހުންގެ ތެރެއިން 83 ޕަސެންޓު މީހުން ރަނގަޅު ވެއްޖެއެވެ.
ކޮވިޑްގެ މައުލޫމާތު ގެނެސްދޭ ހެލްތު މިނިސްޓްރީންގެ ޑޭޝްބޯޑުން ދައްކާގޮތުގައި ރާއްޖެއިން 2468 މީހަކު ވަނީ ބައްޔަށް ފައްސިވެފައެވެ. މީގެ ތެރެއިން މިހާތަނަށް 2049 މީހަކު ރަނގަޅުވެފައިވާއިރު، މިއީ ބަލި ޖެހުނު މީހުންގެ 83 ޕަސެންޓު މީހުންނެވެ.
ރާއްޖެއިން ކޮވިޑް ޖެހިގެން މިހާތަނަށް ނިޔާވެފައި ވަނީ 12 މީހެކެވެ. އޭގެ ތެރޭގައި ހިމެނެނީ ހަ ދިވެހީންނާއި، ބަންގްލަދޭޝްގެ ފަސް މީހަކާއި ފިލިޕީންސްގެ މީހެކެވެ. މިއީ ބަލި ޖެހުނު މީހުންގެ އަދަދަށް ބަލާނަމަ، 0.49 ޕަސެންޓު މީހުންނެވެ.
ކޮވިޑް ބައްޔަށް މިހާރު ފަރުވާ ހޯދަމުން ދަނީ 403 މީހެކެވެ.
މި ބަލި ޖެހިފައިވާ 33 މީހަކު އިއްޔެ ވެސް ވަނީ ފެނިފަ އެވެ. އޭގެ ތެރޭގައި ހިމެނެނީ 12 ދިވެހިންނާއި ބަންގްލަދޭޝްގެ 18 މީހަކާއި އިންޑިއާގެ ތިން މީހެކެވެ.
