ޚަބަރު

ރާއްޖޭގައި ކޮވިޑް ފެތުރެން ފެށިތާ 121 ދުވަސް، މިހާތަނަށް 2469 މީހަކަށް މި ބަލި ޖެހިފައިވޭ

ދެން އެމްވީ ، ދެން އޮންލައިން

ރާއްޖޭގައި ކޮވިޑް-19 ފެތުރެން ފެށިތާ 121 ދުވަސް ވެފައިވާއިރު މިހާތަނަށް 2469 މީހަކަށް މި ބައްޔަށް ފައްސި ވެފައިވާ ކަމަށް ތަފާސް ހިސާބުތަކުން ދައްކައިފިއެވެ.

Ads by STELCO

ރާއްޖެއިން އެންމެ ފުރަތަމަ ކޮވިޑް ފެނިފައިވަނީ މި އަހަރުގެ މާރިޗު މަހުގެ ހަތް ވަނަ ދުވަހުއެވެ. އެ ދުވަހު ދެ މީހަކު ފައްސިވެފައިވާއިރު، ދެ މީހުންނަކީ ވެސް ކުރެއްދޫ ރިސޯޓުގައި މަސައްކަތް ކުރި ދެ މީހުންނެވެ.

އޭގެ ފަހުން ރިސޯޓުތަކުން 20 މީހަކު ފައްސިވިއިރު، ވެރިރަށް މާލެއިން އެންމެ ފުރަތަމަ ކޮވިޑްގެ ކޭސްއެއް ފެނިފައި ވަނީ މި އަހަރުގެ އެޕްރީލް މަހުގެ 15 ވަނަ ދުވަހުއެވެ. އެ ކޭސް ފެނުމާ ގުޅިގެން މާލެ ސަރަހައްދު ވަނީ ލޮކްޑައުން ކޮށްފައެވެ.

މިހާތަނަށް މުޅި ރާއްޖެއިން 2،468 މީހަކަށް ކޮވިޑް-19 ޖެހިފައިވާއިރު، 2،049 މީހަކު ވަނީ މި ބަލިން ރަނގަޅުވެފަ އެވެ. އެކްޓިވް ކޭސްތަކުގެ ގޮތުގައި އުޅެނީ 403 ކޭހެކެވެ.

މި ބަލި ޖެހިފައިވާ 33 މީހަކު އިއްޔެ ވެސް ވަނީ ފެނިފަ އެވެ. އޭގެ ތެރޭގައި ހިމެނެނީ 12 ދިވެހިންނާއި ބަންގްލަދޭޝްގެ 18 މީހަކާއި އިންޑިއާގެ ތިން މީހެކެވެ.

މިހާތަނަށް މި ބަލި ޖެހިގެން ރާއްޖެއިން 12 މީހަކު މަރުވެފައި ވާއިރު، އޭގެ ތެރޭގައި ހިމެނެނީ ހަ ދިވެހީންނާއި، ބަންގްލަދޭޝްގެ ފަސް މީހަކާއި ފިލިޕީންސްގެ މީހެކެވެ.

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!