އީ-ސިނގިރޭޓުން ޑިއުޓީ ބޮޑުކުރަން ނުފެނޭ: މެމްބަރު ހުސައިން
އީ-ސިނގިރޭޓުގެ ބާވަތްތަކުން ނަގާ އިމްޕޯޓު ޑިއުޓީ ބޮޑުކުރަން ނުފެންނަ ކަމަށް ފުވައްމުލަކު މެދު ދާއިރާގެ މެމްބަރު، ހުސައިން މުހައްމަދުދީދީ ވިދާޅުވެއްޖެއެވެ.
މެމްބަރު، ހުސައިން މުހައްމަދުދީދީ މިހެން ވިދާޅުވީ އެކްސްޕޯޓް އިމްޕޯޓްގެ ގާނޫނަށް ގަމު ދާއިރާގެ މެންބަރު މުހައްމަދު ވިސާމް ހުށަހެޅުއްވި އިސްލާހުތަކުގެ ތެރޭގައި ދުންފަތުގެ ބާވަތްތަކުން ޑިއުޓީ ބޮޑުކުރަން ހިމަނާފައިވުމުން، އެކަމަށް ބަހުސް ކުރައްވަމުންނެވެ.
މެންބަރު ހުސައިން ދީދީ ވިދާޅުވީ ސިގިރޭޓުން ނަގާ ޑިއުޓީ ބޮޑުކުރަން ފެންނަ ކަމަށެވެ.
"ސަބަބަކީ އެއީ ދުންފަތުގެ އިސްތިއުމާލު ކުރުމުގެ ސަބަބުން ސިއްހަތަށް ލިބޭ ގެއްލުމުން، އޭގެ ސަބަބުން އަޅުގަނޑުމެންގެ އާސަންދަ ބިލަށް ނޫނިއްޔާ ރާއްޖޭގެ ހެލްތަށް ހަރަދުކުރަންޖެހޭ ނިސްބަތް ބޮޑުތަނުން ބޮޑުވެގެން ދޭ. އެހެންވީމަ އަޅުގަނޑު ދެކޭގޮތުން ސިނގިރޭޓު ބޯ ފަރާތްތަކުން އެބޭފުޅުންނަށް ޖެހޭ ބަލިތަކާއި، އެކަންކަމަށް ހަރަދު ކުރުމަށް އެބޭފުޅުން ފައިސާ ދައްކަން ޖެހޭ ކަމަށް އަޅުގަނޑު ދެކެނީ،" މެމްބަރު ވިދާޅުވިއެވެ.
އެހެން ނަމަވެސް އީ-ސިނގިރޭޓުގެ ބާވަތްތަކުން ޑިއުޓީ ބޮޑުކުރަން ފެނިވަޑައިނުގަންނަވާ ކަމަށް މެމްބަރު ވިދާޅުވިއެވެ.
ސިނގިރޭޓާއި ބިޑި ފިޔަވައި ދުންފަތާއި ދުންފަތުން ތައްޔާރުކޮށްފައި ހުންނަ ބާވަތްތަކާއި، ދުންފަތުގެ ބަދަލުގައި ބޭނުންކުރާ ބާވަތްތަކުން ޑިއުޓީގެ ގޮތުގައި ނަގަނީ 200 ޕަސެންޓެވެ. ސިނގިރޭޓުން ޑިއުޓީގެ ގޮތުގައި މިހާރު 25 ޕަސެންޓު ނަގަމުން އަންނަ އިރު، ސިނގިރޭޓަކަށް ނަގަމުން އައީ ދެ ރުފިޔާ އެވެ.
ނަމަވެސް ވިސާމް ހުށަހެޅުއްވި އިސްލާހުގައި ސިނގިރޭޓާއި ބިޑިއިން ނަގާ ޑިއުޓީ ތިން ރުފިޔާއަށް ބޮޑުކުރަން ވަނީ ހިމަނާފައެވެ.
ހަމައެއާއެކު ސިނގިރޭޓާއި ބިޑި ހެދުމަށް ބޭނުންކުރާ ކަރުދާހުން 200 ޕަސެންޓު ޑިއުޓީ ނަގަންވެސް ބިލުގައި ވަނީ ހިމަނައިފަ އެވެ. އަދި އިލެކްޓްރޯނިކް ސިނގިރޭޓާއި، ވޭޕް ކުރުމަށް ބޭނުންކުރާ އާލާތްތަކާއިި އޭގެ ބައިތަކުން ވެސް 200 ޕަސެންޓު ޑިއުޓީ ނަގަން ބިލުގައި ހިމަނާފައިވެއެވެ.
Ads by STO
