އާރުސީސީގެ މުވައްޒަފުން މުޒާހަރާ ކުރި ކަމަށް ބުނެ އެމްވީކްރައިސިސް އިން ދޮގު ހަބަރު ފެތުރި މައްސަލަ ފުލުހަށް
ރަޝީދު ކާޕެންޓްރީ އެންޑް ކޮންސްޓްރަކްޝަންސް(އާރުސީސީ)ގެ މުވައްޒަފުން މިރޭ މުޒާހަރާ ކުރި ކަމަށް ބުނެ އެމްވީކްރައިސިސް އިން ދޮގު ހަބަރު ގެނެސްދިން މައްސަލަ ފުލުހަށް ހުށަހަޅައިފިއެވެ.
އާރުސީސީގެ ޗެއާމަން އަދި ދަނގެތި ދާއިރާގެ މެމްބަރު މުހައްމަދު ނާޒިމް "ދެން" އަށް މައުލޫމާތު ދެމުން ވިދާޅުވީ ކުންފުނީގެ މުވައްޒަފުންގެ ވިސާ ކާޑު އާ ކުރުމަށް ފޮޓޯ ނަގަން ކިއުގައި ތިއްބާ ފޮޓޯއެއް ނަގައި މީސް މީޑިއާގައި އެ ކުންފުނި ބަދުނާމުވާ ގޮތަށް "އެމްވީ ކްރައިސިސް" އިން ޕޯސްޓު ކޮށްފައިވާތީ އެ ގްރޫޕުގެ މައްސަލަ ފުލުހަށް ހުށަހަޅާ އަދި ދައުވާ ކުރުމަށް ނިންމާފައިވާ ކަމަށެވެ.
ނާޒިމް ވިދާޅުވީ މިފަދަ ދަނޑިވަޅެއްގައި އެގޮތަށް ފޮޓޯ ޖަހައި ދޮގު ހަބަރު ފެތުރުމަކީ ކުންފުންޏާ މެދު ރައްޔިތުންގެ ހިތުގައި ނަފްރަތު އުފެއްދުމަށް ކުރި ކަމެއް ކަމަށެވެ. އަދި އެފަދަ ނާތަހުޒީބު ކަންކަމުން ދުރުވުމަށް ނާޒިމް ވަނީ ގޮވާލައްވާފައެވެ.
ނާޒިމް އިތުރަށް ވިދާޅުވީ އާރުސީސީގެ މުވައްޒަފުންނަށް މުސާރު ނުދީ ނުހުންނާނެ ކަމަށެވެ.
