ގުޅުން ނެތް ކޭސްތައް ދަނީ އިތުރުވަމުން، ބަލި ޖެހޭ މީހުންގެ އަދަދު އިތުރު ވެދާނެ: ޑރ. މުއާޒު
ގުޅުން ނެތް ކޭސްތައް ދަނީ އިތުރުވަމުން، ބަލި ޖެހޭ މީހުންގެ އަދަދު އިތުރު ވެދާނެ ކަމަށް އައިޖީއެމްއެޗްގެ ޑޮކްޓަރު، ޑރ. މުއާޒު މޫސާ ވިދާޅުވިއެވެ.
އެޗްއީއޯސީގައި މިރޭ ބޭއްވި ނޫސްވެރިންގެ ބައްދަލުވުމުގައި ޑރ. މުއާޒު ވިދާޅުވީ ޖޫން މަހުން ފެށިގެން ކްލަސްޓާތަކާ ގުޅުން ނެތް ކޭސްތައް އިތުރުވާކަން ފާހަގަ ވެފައިވާ ކަމަށެވެ. އެހެންކަމުން ރައްކާތެރިކަމުގެ ފިޔަވަޅުތައް ނާޅައިފިނަމަ ފައްސިވާ މީހުންގެ އަދަދު އިތުރުވެދާނެ ކަމަށް އޭނާ ވިދާޅުވިއެވެ.
"އަންލިކް ކޭސްތައް ގިނަ ވަންޏާ އޭގެ މާނައަކީ ކޮމިއުނިޓީގައި ކޮވިޑް ފެތުރޭ މިންވަރު އިތުރުވަނީއޭ. އަދި ކުރިއަށް އޮތްތާ ފައްސިވާ މީހުންގެ އަދަދު އިތުރުވެދާނެ ކަމުގެ ސިގްނަލްއެއް. ކޮންޓްރޯލް ނުކުރެވޭ މިންވަރަށް ބަލި ފެތުރުމުގެ ކުރިން ރައްކާތެރިކަމުގެ ފިޔަވަޅުތައް އިތުރަށް ވަރުގަދަ ކުރުން މުހިންމު،" ޑރ. މުއާޒު ވިދާޅުވިއެވެ.
ޑރ. މުއާޒު ވިދާޅުވީ ފުރަބަންދުގެ ލުއިތަކާއެކު ބޭރަށް ނިކުމެ އުޅޭއިރު ތިމާއާއި ބައްދަލުވާމީހުންގެ ޢަދަދު ވީހާސްވެސް މަދުކުރުމަށް އިލްތިމާސްކުރާ ކަމަށެވެ. އަދި ބަލީގެ އެއްވެސް އަލާމާތެއް ހުރިނަމަ ޢާންމުންގެ ތެރެއަށް ނުނިކުމެ ކްލިނަކަށް ދެއްކުމަށް އަވަސްކުރުމަށް ޑޮކްޓަރ އެދިވަޑައިގަތެވެ.
