ހައުސިން މިނިސްޓްރީ އުވާލުމުން ދޭހަވަނީ ބޯހިޔާވަހިކަމަށް ސަރުކާރުން އިސްކަމެއް ނުދޭކަން: އާދަމް ޝަރީފް
ހައުސިން މިނިސްޓްރީ އުވާލުމުން ދޭހަވަނީ މި ސަރުކާރުން ބޯހިޔާވަހިކަމަށް އިސްކަން ނުދޭކަން ކަމަށް މަޑުއްވަރީ ދާއިރާގެ މެމްބަރު އަދި ޕީއެންސީގެ ނައިބް ރައީސް އާދަމް ޝަރީފް އުމަރު ވިދާޅުވެއްޖެއެވެ.
ހައުސިން މިނިސްޓްރީ އުވާލަން ސަރުކާރުން ނިންމާފައިވަނީ އެ މަގާމުގައި ހުންނެވި އާތިފާ ޝަކޫރު ސިއްހީ ސަބަބުތަކަށްޓަކައި މަގާމުން އިސްތިއުފާ ދެއްވުމާ ގުޅިގެންނެވެ. އެއާ ގުޅިގެން ހައުސިން މިނިސްޓްރީގެ މަސައްކަތްތައް ވަނީ ޕްލޭނިން މިނިސްޓްރީގެ ދަށަށް ބަދަލު ކޮށްފައެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ހައުސިން ހައުސިން މިނިސްޓަރު މުހައްމަދު އަސްލަމް ވިދާޅުވީ ހިޔާ މަޝްރޫއުގެ ދަށުން، ކުރީގެ ރައީސް އަބްދުﷲ ޔާމީންގެ ސަރުކާރުގައި އިއުލާންކުރި އެއް ކޮޓަރީގެ ފްލެޓުތައް އިމާރަތްކޮށްފައި ނުވާ ކަމަށެވެ. ނަމަވެސް، އެ މަސައްކަތްތައް ކުރިއަށްދާ ކަމަށް "މިހާރު" ނޫހުގައި ވަނީ ރިޕޯޓުކޮށްފައެވެ.
މިކަމާ ގުޅިގެން އާދަމް ޝަރީފް ކުރެއްވި ޓްވީޓެއްގައި ވިދާޅުވީ އެކަކަށް މާގިނަ މައްސޫލިއްޔަތު ހަވާލު ކުރުމުން އެފަދަ ކަންކަން އިތުރުވާނެ ކަމަށެވެ.
"ހައުސިން މިނިސްޓްރީ އާއި ޕްލޭނިން މިނިސްޓްރީ އެކަކަށް، ހައުސިން މިނިސްޓްރީ އުވާލުމުން ދޭހަވަނީ ބޯހިޔާވަހިކަމަށް ސަރުކާރުން އިސްކަމެއް ނުދޭކަން، ބޯހިޔާވަހި ކަން ހައްލުކުރެވޭނީ ޕީޕީއެން/ޕީއެންސީ އަށް." އާދަމް ޝަރީފް ވިދާޅުވިއެވެ.
Ekakah maagina masooliyyathu havaalu kurumun mifadha kankan ithuruvaane, Planning Ministry aai Housing Ministry ekakah! Housing Ministry uvaalumun dheyhavanee boahiyaavahikamah sarukaarun iskameh nudheykan. Boahiyaavahikan hallukureveynee PPMPNC ah.
https://t.co/9yaArrj6gJ— Adam Shareef Umar (@Adamshareefz) July 6, 2020
މިނިސްޓަރު އަސްލަމް މިއަދު ވިދާޅުވީ، ހިޔާ މަޝްރޫއުގައި ކެޓަގަރީތަކަކަށް ބަހާލައިގެން އެއް ކޮޓަރި އާއި ދެ ކޮޓަރީގެ ފްލެޓުތައް ދޫކުރަން ޔާމީންގެ ސަރުކާރުން ނިންމާފައިވިޔަސް ދެ ވަނަ ފިޔަވަހީގައި އިމާރާތް ކޮށްފައި ވަނީ ހަމައެކަނި ދެ ކޮޓަރީގެ ފްލެޓުތައް ކަމަށެވެ.
ހިޔާ މަޝްރޫއުގައި އެއް ކޮޓަރީގެ ފްލެޓްތައް ނާޅާ ކަމަށް މިނިސްޓަރު ވިދާޅުވި ނަމަވެސް ބައެއް ފްލެޓުތަކުގެ މަސައްކަތް އަންނަނީ ކުރަމުންނެވެ. އޭގެ ތެރޭގައި ސްޓެލްކޯ އަދި އެމްޕީއެލްގެ ތަންތަން ހިމެނެ އެވެ. އެނގިފައިވާ ގޮތުގައި މީގެ ތެރެއިން ބައެއް ފްލެޓްތަކުގެ މަސައްކަތް ވަނީ ހުއްޓިފަ އެވެ.
