ތިނަދޫއަށް އުދަ އެރުމުން މަޖިލީހަށް ކުއްލި މައްސަލައެއް
ގދ. ތިނަދޫއަށް މިދިއަ އާދީއްތަ ދުވަހު ވަރަށް ބޮޑަށް އުދަ އަރާފައިވާތީ ރައްޔިތުންގެ މަޖިލީހުގެ ސަމާލު ކަމަށް ގެނައުމަށް އެ މަޖިލީހަށް ކުއްލި މައްސަލައެއް ވައްދައި ބަހުސް ފަށައިފި އެވެ.
ކުއްލި މައްސަލަ މަޖިލިހަށް ހުށަހަޅުއްވައި ދެއްވީ ތިނަދޫ ދެކުނު ދާއިރާގެ އެމްޑީޕީގެ މެމްބަރު އަބްދުﷲ ސަނީފެވެ. ސަނީފް ވިދާޅުވި ގޮތުގައި އެ މައްސަލަ މަޖިލިހަށް ހުށަހެޅުއްވީ އެ ރަށަށް އުދަ އަރައި، ރައްޔިތުންނަށާއި މުދަލަށް ބޮޑެތި ގެއްލުންތަކެއް ލިބެމުންދާތީއެވެ.
މި ކުއްލި މައްސަލަ މަޖިލީހުގެ ތަޅުމަށް ބަލައިގަނެ ބަހުސަށް ހުޅުވާލަން ފާސްކުރީ 37 މެންބަރުންގެ ވޯޓުންނެވެ. ތަޅުމަށް ބަލައިގަންނަން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވަ އެވެ.
ސަނީފްގެ ކުއްލި މައްސަލައިގައި ވަނީ ތިނަދު އަށް އުދަ އެރުމުގެ ސަބަބުން ރަށާއި އަތޮޅާއި އެހެނިހެން ރައްޔިތުންގެ ތަކެއްޗަށް އޭގެ ނޭދެވޭ އަސަރުކޮށްފައިވާ ކަމަށާއި މިކަމަކީ ކޮންމެ އަހަރަކު މަދުވެގެން ހަ ވަރަކަށް ފަހަރު ދިމާވާ މައްސަލައެއް ކަމަށެވެ. އަދި މިވީހާ ތަނަށް މިކަމަށް ހައްލެއް ލިބިފައި ނުވާ އިރު، އުދަ އެރުމުގެ ސަބަބުން ރަށުގެ ބަނދަރުގައި އަޅާފައިވާ އޮޑި ދޯނި ފަހަރަށް ގެއްލުންވެފައިވާ ކަމަށް ކުއްލި މައްސަލައިގައިވެއެވެ.
