މެލޭޝިޔާ ކުންފުންޏަށް އެޗްޑީސީން 352 މިލިއަން ރުފިޔާ ދައްކަން ޖެހިއްޖެ
މެލޭޝިޔާގެ ޑަބްލިއުޒެޑްއާރް ޕްރޮޕަޓީއާ ހަވާލުކުރެވުނު 25 ބުރީގެ އިމާރާތް އެޅުމަށް އެކުންފުނިން މިހާތަނަށް ކުރި މަސައްކަތަށް ދޭން ޖެހޭ ފައިސާ ދިވެހި ސަރުކާރުން ނުދީގެން އޭޝިއަން އިންޓަނޭޝަނަލް އާބިޓްރޭޝަން ކޯޓަށް ހުށައެޅި މައްސަލަ ދިވެހި ސަރުކާރާ ދެކޮޅަށް ނިމި، 352 މިލިއަން ރުފިޔާ އެ ކުންފުންޏަށް ދައްކަން ހުކުމްކޮށްފިއެވެ.
މިއިމާރާތް އަޅަން ބިޑަކާ ނުލާ މެލޭޝިޔާ ކުންފުންޏާ ހަވާލުކުރީ ކުރީގެ ރައީސް އަބްދުﷲ ޔާމީންގެ ވެރިކަމުގައެވެ. އެކުންފުނިން ބުނީ އިމާރާތުގެ ފުރަތަމަ މަރުހަލާގެ މަސައްކަތް ނިމުމުން، އެޗްޑީސީން ދައްކަން ޖެހޭ ފައިސާގެ އެއްވެސް މިންވަރެއް ލިބިފައިނުވާ ކަމަށެވެ.
ޑަބްލިއު.ޒެޑް.އާރު ޕްރޮޕަޓީން މިދިޔަ އަހަރުގެ ސެޕްޓެމްބަރު މަހު ހުށަހެޅި މި މައްސަލަ ނިންމީ މި މަހުގެ ފަސް ވަނަ ދުވަހު އެވެ.
މެލޭޝިއާ ކުންފުނިން އާބިޓްރޭޝަނަށް ހުށަހެޅީ މުޅި މަސައްކަތުގެ އަގު ކަމަށްވާ ގާތްގަނޑަކަށް 462 މިލިއަން ރުފިޔާ ހޯދުމަށެވެ. އެކަމަކު އާބިޓްރޭޝަނުން ނިންމީ ކޮށްފައިވާ މަސައްކަތަށް އަގު ދިނުމަށެވެ.
މެލޭޝިޔާ ކުންފުނިން ބުނެފައިވަނީ އިމާރާތް ނޭޅުމަށް މިސަރުކާރުން ނިންމީ، އިމާރާތުގެ 20 ޕަސެންޓު މަސައްކަތް ނިމިފައިވަނިކޮށް ކަމަށެވެ. އަދި ޕައިލިންގެ 60 ޕަސެންޓު މަސައްކަތް ނިމިފައިވާނެ ކަމަށެވެ. އެއްބަސްވުމުގައި އެ މަސައްކަތް ނިމުމުން އެޗްޑީސީން ދައްކަން ޖެހޭ ފައިސާ ދެއްކުމުން މަސައްކަތް ކުރިއަށްދާނެ ގޮތަށް އޮތް ނަމަވެސް މިސަރުކާރު އައިސް ވަނީ އެ ޕްރޮޖެކްޓު ހުއްޓާލާފައެވެ.
Ads by STO
