ފީފާއިން ރާއްޖެ ސަސްޕެންޑް ކޮށްފި ނަމަ ގޯސްވާނީ އަޅުގަނޑާއި ރައީސް ސޯލިހު: މަހުލޫފް
ފުޓުބޯޅައިގެ މައި އިދާރާ، ފީފާ އިން ރާއްޖެ ފުޓްބޯޅައިގެ ހަރަކާތްތްތަކުން ސަސްޕެންޑްކޮށްފިނަމަ ގޯސްވާނީ ޔޫތް މިނިސްޓަރު އަހުމަދު މަހްލޫފް އާއި ރައީސް އިބްރާހިމް މުހައްމަދު ސޯލިހް ކަމަށް މަހުލޫފް މިއަދު ވިދާޅުވެއްޖެ އެވެ.
އެފްއޭއެމް އަށް ތިން ވަނަ ފަރާތެއްގެ ނުފޫޒު ވަންނަ ނަމަ، ދިވެހި ފުޓްބޯޅަ އަށް ސަސްޕެންޝަނެއް އަތުވެދާނެ ކަމަށް ފީފާ އިން އިންޒާރު ދީފައި ވަނީ މިދިޔަ ހަފްތާ ތެރޭގައެވެ.
ފީފާއިން ރާއްޖެއަށް އެގޮތަށް އިންޒާރު ދިނީ، ރައްޔިތުންގެ މަޖިލީހުގެ ޖަލްސާއެއްގައި އެފްއޭއެމް އާ ބެހޭގޮތުން މައްސަލައެއް ހުށަހަޅައި ބަހުސްކޮށް ކޮމިޓީ މަރުހަލާ އަށް ފޮނުވާފައި ވަނިކޮށެވެ. މި މައްސަލަ ހުށަހެޅީ މެދު ހެންވޭރު ދާއިރާގެ މެމްބަރު އަލީ އާޒިމ އެވެ.
އެފްއޭއެމް އާ ގުޅިގެން ރައްޔިތުންގެ މަޖިލީހުގެ އިޖްތިމާއީ ކޮމިޓީއަށް ހުށަހެޅިފައިވާ މައްސަލައާ ގުޅިގެން މިއަދު އެކޮމިޓީގައި ވާހަކަ ދައްކަވަމުން މިނިސްޓަރު މަހްލޫފު ވިދާޅުވީ އެފްއޭއެމްގެ އިންތިހާބުގެ މައްސަލަ އަލީ އާޒިމް ފިޔަވައި އާންމު މީހަކުވެސް އަދި ކްލަބަކުންވެސް އެއްވެސް ތަނަކަށް މިހާތަނަށް ހުށަހަޅާފައި ނުވާކަމަށެވެ.
މަހުލޫފް ވިދާޅުވީ މެމްބަރު އާޒިމްއާ އެކު އެ ގާރާރުގައި ހުރި ކަންތައްތަކާ ބެހޭގޮތުން މަޖިލީހަށް ހުށަހެޅުމުގެ ކުރިން މަޝްވަރާކުރެވި އެކަންކަމާ ބެހޭ މައުލޫމާތު ސްޕޯޓްސް ކޮމިޝަނަރު މެދުވެރިކޮށް އެފްއޭއެމުން ސާފުކުރި ކަމަށެވެ. އަދި ހުށަހެޅިފައިވާ މައްސަލަ ބަލައި ނިމެންދެން އެފްއޭއެމްގެ އިންތިހާބު ފަސްކުރަން މަޖިލީހުން އެދުނު ގޮތަށް އެފްއޭއެމްގައި މިނިސްޓްރީން އެދުނު ނަމަވެސް އެއީ ކުރެވޭނެ ކަމެއް ކަމަށް މިނިސްޓަރު ގަބޫލުނުކުރައްވަ އެވެ.
މިނިސްޓަރު ވިދާޅުވީ އެފްއޭއެމްގައި ގޯސްތަކެއް އެބަހުރި ކަމަށާއި ނަމަވެސް ކްލަބުތަކުން އެކަންކަން ރަނގަޅުކުރަން ބޭނުން ނުވާ ނަމަ އޭނާއަށް ކުރެއްވޭނެ ކަމެއް ނެތް ކަމަށެވެ.
މި މައްސަލާގައި މަހްލޫފް ވިދާޅުވީ ކްލަބު ތަކުން ވޯޓު ދީގެން އެފްއޭމްގެ އިންތިހާބު ބާއްވައި އެކަން ފީފާއާއި އޭއެފްސީން އެ އިންތިހާބު ބަލައިގެންފައި ވަނިކޮށް އިންތިހާބު ބަލައިނުގަތުމަށް ނިންމައިފި ނަމަ ފީފާގެ ސަސްޕެންޝަނެއް ރާއްޖެއަށް އަންނާނެ ކަމަށެވެ. އެހެން ކަމުން ފުޓުބޯޅަ އަށް ގެއްލުން ވާ ގޮތަށް އެއްވެސް ކަމެއް ނުކުރުމަށް މިނިސްޓަރު ވަނީ މިއަދުގެ ބައްދަލުވުމުގައި އެދިވަޑައިގެންފައެވެ.
Ads by STO
