މިއަހަރު މިނިވަން ދުވަހުގެ އެއްވެސް އިޙްތިފާލެއް ނުބާއްވަން ރައީސް ޞާލިޙު ނިންމަވައިފި!
ރާއްޖޭގެ މިނިވަން ދުވަހުގެ މުނާސަބަތުގައި ކޮންމެ އަހަރަކުވެސް ބާއްވަމުން ގެންދަވާ އިޙްތިފާލުތައް، މިއަހަރު ނުބޭއްވުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ނިންމަވައިފިއެވެ.
ރައީސް ޞާލިޙުގެ މިނިންމެވުމާއި ގުޅިގެން ރައީސުލްޖުމްހޫރިއްޔާގެ ދެކަނބަލުން ބާއްވަވާ ރަސްމީ ބައްދަލުކުރެއްވުމާއި، މިނިވަންދުވަހުގެ މުނާސަބަތުގައި ބާއްވަވާ ކުޅިވަރުތަކާއި އެހެނިހެން ޙަރަކާތްތައް މި އަހަރު ނުބާއްވަވާނެކަމަށް ރައީސް އޮފީހުން ވަނީ ވިދާޅުވެފައެވެ.
ވަޒީރުންގެ މަޖިލީހުގެައި މިއަދު ދެއްކެވި ވާހަކަފުޅުގައި ރައީސް ޞާލިޙު ވިދާޅުވެފައިވަނީ މިނިވަން ދުވަހުގެ އެއްވެސް އިޙްތިފާލެއް މިއަހަރު ނުބޭއްވުމަށް ނިންމަވާފައިވަނީ ކޮވިޑް-19 އާ ގުޅިގެން، ރާއްޖޭގެ އިޤްތިޞާދަށް ކުރިމަތިލާންޖެހުނު ދަތިތަކާއެކު، ދައުލަތުގެ ޚަރަދުތައް ކުޑަކުރެއްވުމަށް ސަރުކާރުން އަޅުއްވަމުން ގެންދަވާ ފިޔަވަޅުތަކާއި ގުޅިގެންނާއި، ކޮވިޑް-19 އާ ގުޅިގެން، ޢާއްމު ރައްޔިތުންގެ ޞިއްޙަތާއި ރައްކާތެރިކަން ކަށަވަރު ކުރެއްވުމަށްޓަކައި، ތަފާތު ފިޔަވަޅުތައް އަޅުއްވަމުން ގެންދަވާތީ ކަމަށެވެ.
އިޙްތިފާލުތައް ނުބާއްވަން ނިންމަވާފައިވީ ނަމަވެސް މިނިވަންދުވަހުގެ މުނާސަބަތުގައި ރައީސް ޞާލިޙު ޤައުމާ މުޚާޠަބު ކުރެއްވުން އޮންނާނެކަމަށާއި، އެމަނިކުފާނު ޤައުމާ މުޚާޠަބު ކުރައްވާނީ ޖުލައި 26 ވާ އާދީއްތަ ދުވަހުގެ ހެނދުނު 10 ޖަހާއިރު ކަމަށް ރައީސް އޮފީހުން މައުލޫމާތު ދެއްވާފައިވެއެވެ.
