މަގު އޮތީ ބަންދު ކޮށްފަ، އެހެންނަމަވެސް "ވަލު ދޮރާށިން" ވަދެ މިއައީ ފްލެޓުތައް ބަލާލާފަ: އިދިކޮޅު
ކުރީ ސަރުކާރުގައި ހިޔާ މަޝްރޫޢުގެ ދަށުން އިމާރާތްކުރަން ފެށި އެއް ކޮޓަރީގެ އެޕާޓްްމަންޓުތައް ހުރި ސަރަހައްދަށް ދެވެން އޮންނަ މަގު އޮތީ ބަންދުކޮށްފައި ކަމަށާއި އެކަމަކު "ވަލު ދޮރާށި" އިން އެތަނަށް މިއަދު ވަދެ، ބަލާފައި ކަމަށް ޕީއެންސީގެ ނައިބު ރައީސް އަދި މަޖިލިސް ބާރަށު ދާއިރާ ކުރީގެ މެމްބަރު އިބްރާހީމް ސުޖާއު ވިދާޅުވިއެވެ.
ހުޅުމާލޭ ދެވަނަ ފިޔަވަހީގައި ތަރައްގީކޮށްފައިވާ ފްލެޓްތައް ބަލާލުމަށް ފަހު އިދިކޮޅު ކޯލިޝަނުން އެސަރަހައްދުގައި ބޭއްވި ނޫސްވެރިންގެ ބައްދަލުވުމުގައި ސުޖާއު ވިދާޅުވީ ފްލެޓުތައް ބަލާލުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގައި އެދުމުން، ދިން އެ ފުރުސަތުގައި އެތަނުގެ އިސްވެރިއަކަށް އިިދިކޮޅާއެކު ފްލެޓުތައް ބަލާލަން އަންނަން ނުކުރެން ކަމަށާއި އާދައިގެ މުވައްޒަފަކު ފޮނުވާއި، އެތަންތަން ދައްކާލިއިރު، އިދިކޮޅަށް ހުއްދަ ދިނީ ހަމައެކަނި ހިޔާ ފްލެޓުތައް ބަލާލުމަށް ކަމަށެވެ.
ސުޖާއު ވިދާޅުވީ އެއް ކޮޓަރީގެ ފްލެޓުތައް ހުރި ސަރަހައްދަށް ދެވެން އޮންނަ މަގު އޮތީ ބަންދުކޮށްފައި ކަމަށާއި ނަމަވެސް "ވަލު ދޮރާށި" އިން އެތަނަށް ވެސް މިއަދު ވަދެ، އެތަން ވެސް ބެލިކަމަށް ކަމަށެވެ.
މީގެއިތުރުން ހިޔާ މަޝްރޫއުގެ ދަށުން އެއް ކޮޓަރީގެ އެޕާޓްމަންޓްތަކެއް އެޅުމަށް ކުރީ ސަރުކާރުން އިއުލާންކުރި ނަމަވެސް އެއިން އެއްވެސް ފްލެޓެއްގެ މަސައްކަތް ފަށާފައި ނުވާ ކަމަށް ވިދާޅުވެ ޕްލޭނިން އެންޑް ހައުސިން މިނިސްޓަރު މުހައްމަދު އަސްލަމް އިއްޔެ ހެއްދެވީ އިތުރުފުޅެއް ކަމަށް ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ވެސް ވަނީ މިބައްދަލުވުމުގައި ވިދާޅުވެފައެވެ.
