ކުޑަ ކުއްޖަކަށް ޖިންސީ ގޯނާކުރިކަމުގެ މައްސަލައެއްގައި މާފުށީގައި އިހުތިޖާޖު ކުރަނީ!
ކުޑަ ކުއްޖަކަށް ޖިންސީ ގޯނާ ކުރި މައްސަލައެއްގައި، އިތުބާރު ހުރި މަގާމެއްގައި ހުރި ފަރާތެއްގެ އިހުމާލު ހިމެނޭ ކަމަށް ތުހުމަތުކޮށް އޭނާއާއިމެދު ފިޔަވަޅު އެޅުމަށް ގޮވާލާ ކ. މާފުށީ ގައި އިހުތިޖާޖު ކުރަމުން އެބަދެއެވެ.
ފުލުހުންގެ މީޑިއާ އޮފިިޝަލަކު ވިދާޅުވެފައިވަނީ މިއިހުތިޖާޖުގައި އެއްވެސް ހަމަނުޖެހުމެއް ހިނގާފައި ނުވާ ކަމަށާއި ފުލުހުން ދަނީ އިހުތިޖާޖު ހިނގަމުންދާ ސަރަާޙއްދުގެ ސަލާމަތީ ކަންކަން ބަލަހައްޓަމުން ކަމަށެވެ.
މިކަމާއި ގުޅޭގޮތުން އިތުރު އެއްވެސް ތަފްސީލެއް ފުލުހުން ހާމަ ކޮށްފައިނުވާއިރު، ޖިންސީ ގޯނާގެ މައްސަލަތައް މިފަހަކަށް އައިސް ރާއްޖޭގައި ވަނީ ވަރަށް ބޮޑަށް އާއްމުވެފައެވެ.
އެކަމާއި ގުޅޭގޮތުން ކަންބޮޑުވުން ފާޅުކޮށް އާއްމު ރައްޔިތުންގެ ތެރެއިން ވެސް ބަޔަކު ވަނީ ކުރިން އިހުތިޖާޖު ކޮށްފައެވެ.
އެނގިފައިވާ ގޮތުގައި ކ. މާފުށީގައި މުޒާހަރާ ކުރަމުންދަނީ، ފިރިމީހާގެ ފަރާތުން އުމުރުން 10 އަހަރުގެ ދަރިފުޅަށް ޖިންސީ ގޯނާ ކުރަމުންދާކަން އެނގިހުރެ އެކަން ފޮރުވި މަންމައަކު އެރަށުން ބޭލުމަށް ގޮވާލައެވެ.
މިމައްސަލާގައި ދޮންދަރިއަށް ޖިންސީ ގޯނާކުރި މައްސަލާގެ ތުހުމަތުގައި ހައްޔަރުކޮށްފައިވާ މީހާގެ ބަންދަށް 15 ދުވަސް ވަނީ ޖަހައިފަ އެވެ. މި ތުހުމަތުގައި ހައްޔަރުކޮށްފައިވަނީ 57 އަހަރުގެ މީހެކެވެ.
