ދޮންބައްޕައަކު ދަރިފުޅަށް ޖިންސީ ގޯނާކުރިއިރު އަޅާނުލާހުރިކަމަށް ބުނާ މަންމަ މާފުށިން ބާލައިފި!
ދޮންބައްޕައަކު އުމުރުން 10 އަހަރުގެ ކުޑަ ދަރިފުޅަށް ޖިންސީ ގޯނާ ކުރާކަން އެނގިހުރެ، އެކަމާއި އަޅާނުލާ ހުރިކަމަށް ބުނާ "މަންމަ" މާފުށިން ބާލައިފިއެވެ.
ކުޑަ ދަރިފުޅަށް ޖިންސީ ގޯނާ ކުރިއިރުވެސް އަޅާނުލާ ހުރެ، އިހުމާލުވި ކަމަށް ބުނެ، މާފުށީގައި މިއަދު ވަނީ ކަންބޮޑުވުން ފާޅުކޮށް އިހުތިޖާޖު ކޮށްފައެވެ. އެއިހުތިޖާޖުގައި އެރަށު މީހުން ގޮވާލާފައިވަނީ އެއަންހެން މީހާ މާފުށިން ބާލައި، ފިޔަވަޅު އެޅުމަށެވެ.
ފުލުހުންގެ މީޑިއާ އޮފިޝަލަކު ވިދާޅުވެފައިވަނީ މާފުށިގައި އިހުތިޖާޖު ކުރިކަމަށާއި ނަމަވެސް އެއްވެސް ހަމަނުޖެހުމެއް ނުހިނގާ ކަމަށެވެ. އަދި މިހާރު އެމީހާ ފުލުހުންގެ ބެލުމުގެ ދަށުން މާފުށިން ބާލައިފައިވާ ކަމަށް ވެސް ފުލުހުން ވިދާޅުވެފައިވެއެވެ. އިތުރު ތަފްސީލެއް ދެއްވާފައެއް ނުވެއެވެ.
އުމުރުން 10 އަހަރުގެ ކުޑަ ކުއްޖަކަށް ޖިންސީ ގޯނާ ކުރިކަމުގެ ތުހުމަތުގައި 57 އަހަރުގެ ދިވެހި ފިރިހެނަކު މިދިޔަ ހުކުރު ދުވަހު ހައްޔަރު ކޮށްފައިވާއިރު އޭނާގެ ބަންދަށް 15 ދުވަސް މާފުށީ މެޖިސްޓްރޭޓް ކޯޓުން ވަނީ ޖަހާފައެވެ.
