ކޮވިޑްގެ ހާލަތު ކުރިމަތިވިއިރު ވެރިކަމުގައި އެމްޑީޕީ އޮތުން އެއީ ދިވެހިންގެ ނަސީބު: ނަޝީދު
ރާއްޖެއަށް ކޮވިޑް-19ގެ ހާލަތު ކުރިމަތިވިއިރު ވެރިކަމުގައި އެމްޑީޕީގެ ސަރުކާރެއް އޮތުން އެއީ ދިވެހިންގެ ނަސީބު ކަމަށް އެ ޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ މިރޭ ބޭއްވި އެމްޑީޕީގެ ގައުމީ މަޖިލިސް ޖަލްސާގައި ވާހަކަ ދައްކަވަމުންނެވެ.
ނަޝީދު ވިދާޅުވީ ރާއްޖޭގެ ރައްޔިތުން ސަލާމަތުގެ އައްސޭރިއަށް ގެންގޮސްދޭނީ އެމްޑީޕީ ކަމަށާއި ދިވެހީންނަށް ދިމާވެފައި އޮތް އެންމެ ބޮޑު އެއް ނަސީބަކީ ކޮވިޑްގެ ބޮޑު ރޯގާ ޖެހުނުއިރު އެރައްޔިތުންގެ މައްޗަށް ވެރިކަންކުރަން އެމްޑީޕީގެ މެމްބަރުން ތިއްބެވިކަން ކަމަށެވެ.
"އާދެ އަޅުގަނޑުމެން މިތިބީ ތާށީގައި. އެކަމު އިރާދަކުރެއްވިއްޔާ ދިވެހި ރައްޔިތުންގެ ޑިމޮކްރެޓިކް ޕާޓިއަކީ ތާށީގައި ތިބޭނެ ޕާޓިއެއް ނޫން. އަޅުގަނޑުމެންގެ އުއްމީދުތަކާއި އަޅުގަނޑުމެންގެ ވަޢުދުތަކާއެކީ މިޕާޓީ ނުކުންނާނެ." ނަޝީދު ވިދާޅުވިއެވެ.
ނަޝީދު ވިދާޅުވީ ލާމަރުކަޒީ ނިޒާމުގެ ވައުދު ވެސް ފުއްދަމުން އަންނަ ކަމަށާއި ދައުލަތުގެ ބަޖެޓުން ކައުންސިލްތަކަށް ބަޖެޓް ދޫކުރަން ފެށުމާއި އަމިއްލަ އަށް މަސައްކަތްތައް ޓެންޑާ ކުރެވޭ ގޮތް ވެސް ހެދޭނެ ކަމަށެވެ. އޭގެ އިތުރުން ރާއްޖޭގެ އުތުރާއި ދެކުނުގައިވާ ސަރަހައްދީ ވިޔަފާރި ބަނދަރުތަކަށް އެތެރެކުރާ މުދަލުން ޑިއުޓީ ކުޑަވާ ގޮތަށް މަޖިލީހުގެ މުޅި މަޖިލީހުގެ ކޮމިޓީން ނިންމި ނިންމުމަކީ ވެސް ލާމަރުކަޒު ވުމަށް އެޅި ވަރުގަދަ ފިޔަވަޅެއް ކަމަށް އެމަނިކުފާނު ވިދާޅުވި އެވެ.
