ލޯކަލް މާރުކޭޓު މިމަހު 10 ހިސާބުގައި ހުޅުވަނީ
ލޮކްޑައުންއާ ގުޅިގެން ބަންދުކުރި މާލޭ ލޯކަލް މާރުކޭޓު މި މަހުގެ 10 ހާ ހިސާބުގައި ހުޅުވޭވަރު ވާނެ ކަމަށް މާލެ ސިޓީ ކައުންސިލްގެ ޑެޕިއުޓީ މޭޔަރު ޝަމާއު ޝަރީފު ވިދާޅުވެއްޖެއެވެ.
ހެލްތު އެމަޖެންސީ އޮޕަރޭޝަންސް ސެންޓަރުން ރޭ ބޭއްވި ނޫސްވެރިންގެ ބައްދަލުވުމުގައި ޝަމާއު ވިދާޅުވީ ލޮކްޑައުންއަށް ދިން ލުއިތަކާއެކު ވެސް މާރުކޭޓު ބަންދުކޮށްފައި އޮތީ އެޗްޕީއޭގެ މިންގަނޑުތަކަށް ނުފެތޭތީ ކަމަށެވެ.
އޭނާ ވިދާޅުވީ އެކަންކަން އިސްލާހު ކުރުމުގެ މަސައްކަތް މި ހަފުތާ ތެރޭގައި ވެސް އެބަ ކުރިއަށްދާ ކަމަށާއި މި މަހުގެ 10 ހިސާބުގައި އެތަން ހުޅުވިގެންދާއިރު، ގައިޑްލައިންއަށް ފެތޭވަރު ވާނެ ކަމަށެވެ.
ލޯކަލް މާރުކޭޓު ބަންދުކޮށްފައިވީ ނަމަވެސް، ލޮކްޑައުންއަށް ގެނައި ލުއިތަކާއެކު މަސް މާރުކޭޓާއި ދަތުރުވެރިންގެ މާރުކޭޓު ހުޅުވުމަށްފަހު ދަނީ ހިދުމަތް ދެމުންނެވެ. ޝަމާއު ވިދާޅުވީ އެ ދެ މާރުކޭޓު ވެސް ހުޅުވީ އެޗްޕީއޭގެ ގައިޑްލައިންތަކަށް ފެތޭތީ ކަމަށެވެ.
