މަޖިލީހުގައި މެމްބަރަކު އަވަހާރަކޮށްލާ ވާހަކަ ވެސް ދެއްކޭނެ: ނަޝީދު
ގަރާރެއް މެދުވެރިކޮށް ރައްޔިތުންގެ މަޖިލީހުގެ މެމްބަރަކު އަވަހާރަކޮށްލުން ފަދަ ވާހަކަތައް ވެސް ދެއްކޭނެ ކަމަށް އެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ، ސިޓީ ކައުންސިލްތަކާއި އަތޮޅު ކައުސިލްތަކާއި ރަށު ކައުންސިލްތަކުގެ އިތުރުން، ލޯކަލް ގަވާމަންޓް އޮތޯރިޓީ އުވާލުމަށް ގޮވާލައި ކާށިދޫ ދާއިރާގެ މެންބަރު އަބުދުﷲ ޖާބިރު ރައްޔިތުންގެ މަޖިލީހަށް ހުށަހަޅާފައިވާ ގަރާރަކީ ގާނޫނުއަސާސީއާ ހިލާފު ގަރާރެއް ކަމަށް ބައެއް މެމްބަރުން ވިދާޅުވުމާ ގުޅިގެންނެވެ.
މެމްބަރުންގެ އެ ވާހަތަކަށް އިޝާރާތް ކުރައްވައި، ރައީސް ނަޝީދު ވިދާޅުވީ އިސްލާމް ދީނުގެ އަސްލަކާ ހިލާފު ނުވާހާ ހިނދަކު މަޖިލީހުގައި ގަރާރެއް ހުށަހަޅައިގެން ކޮންމެ ވާހަކައެއް ވެސް ދެއްކެވި ދާނެ ކަމަށެވެ. މިސާލެއްގެ ގޮތުގައި ދެން ވިދާޅުވީ ގާނޫނު އަސާސީ އުވާލުމާއި މެމްބަރަކު އަވަހާރަ ކޮށްލުމުގެ ވާހަކަ އެވެ.
މި މަޖިލީހުގައި ގަރާރަކުން ނުދެކޭނެ ހަމައެކަނި ވާހަކަ އަކީ އިސްލާމްދީނުގެ އަސްލަކާ ހިލާފު ވާ ވާހަކަ ކަމަށާއި، "މި މަޖިލީހުގައި ގަރާރަކުން ދެއްކިދާނެ އިއްޒަތްތެރި މެމްބަރަކު އަވަހާރަ ކޮށްލުމުގެ ވާހަކަވެސް،" ރައީސް ނަޝީދު ވިދާޅުވިއެވެ.
Ads by STO
