ބޮޑުފިނޮޅަށް ދިޔަ ފުލުހުންނަށް ބިދޭސީން ހަމަލާދިނީ އޮޅިގެން: ވަކީލު
ބ. ބޮޑުފިނޮޅުގައި ބިދޭސީންތަކެއް ހަމަނިޖެހުން ހިނގަން ފެށުމުން އެރަށަށް ދިޔަ ފުލުހުންނަށް ހަމަލާދިނީ، ގޭންގެއް ކަމަށް ހީކޮށް ކަމަށް އެ ބިދޭސީންގެ ޤާނޫނޫ ވަކީލަކު ވިދާޅުވެއްޖެއެވެ.
ބިދޭސީންގެ ދިފާއީ ވަކީލު އާމިނަތު ނަޝްއާ އާދިލް ނެރުއްވި ބަޔާނުގައި ބުނެފައި ވަނީ ބޮޑުފިނޮޅުގައި ހަމަނުޖެހުން ހިންގުމަށް މެދުވެރިވީ އެރަށް ރިސޯޓެއްގެ ގޮތުގައި ތަރައްގީކުރާ ސީލް މޯލްޑިވްސްއަށް ނިސްބަތްވާ ދިވެހި މީހަކު ބިދޭސީންނަށް ބިރުދެއްކުމުން ކަމަށެވެ.
ބިދޭސީންނަށް ބިރު ދައްކައި ހަމަލާދޭން އެރަށަށް އޭގެ ކުރިންވެސް ބަޔަކު ދިޔަކަމާއި، ފުލުހުން އައުމުން ތޫނު ހަތިޔާރާއެކު ފުލުހުންނާއި ކުރިމަތި ލެވުނީ އެއީ ކުރީގައިވެސް ރަށަށް އަރައި ތޫނު ހަތިޔާރާއެކު މަރާމާރީ ހިންގަން އުޅުނު މީހުންކަމަށް ހީވުމުން އަމިއްލަ ސަލާމަތަށްޓަކައި ކަމަށްވެސް އެ ބިދޭސީ މީހާ އާއި ހަވާލާދީ އެ ބަޔާނުގައި ބުނެފައިވެއެވެ.
ބޮޑުފިނޮޅުގައި ހަމަނުޖެހުންތައް ހިނގަމުންދާތީ އެރަށަށް ދިޔަ ފުލުހުންނާއި ކުރިތިލައި ހަމަލާދެވުނީ އޮޅިގެންކަމުގައި ބިދޭސީން ބުނެފައިވާއިރު، ފުރަތަމަ ފުލުުހުން އެރަށަށް ގޮސްފައި ވަނީ ފުލުހުންގެ ލޯންޗެއްގައެވެ. އެލޯންޗަށް ބިދޭސީން ދަގަނޑުބުރިތަކާއި ލަކުޑިބުރިތައް އުކައި ހަމަލާދީފައިވެއެވެ. އެމަންޒަރު ފެންނަ ފޮޓޯ އާއި ވީޑިއޯވެސް ވަނީ އާއްމުވެފައެވެ.
Ads by STO
