ލިޔުންތެރިއަކަށް ވާން އެދެންޏާ، ކިޔުންތެރިއަކަށް ވާށެވެ.: އަޝްރަފް އަލީ
މިއަދަކީ ދިވެހިރާއްޖޭގެ 27ވަނަ ލިޔުންތެރިންގެ ދުވަހެވެ.
މިދުވަހުގެ އުފާވެރި ތަޙުނިޔާއާއި މުބާރިކްބާދީ ލިޔުންތެރިންނަށާއި ލިޔުންތެރިކަމަށް ލޯބިކުރައްވާ އެންމެހާ ފަރާތްތަކަށް އަރިސްކުރައްވަމުން ދިވެހިބަހުގެ އެކެޑެމީގެ ރައީސް އަލްފާޟިލް އަޝްރަފް އަލީ އެމަނިކުފާނުގެ ފޭސްބުކް އެކައުންޓުގައި ވިދާޅުވީ ލިޔުންތެރިއަކަށް ވާން އެދެންޏާ ކިޔުންތެރިއަކަށް ވެސް ވުމަށެވެ.
މީގެއިތުރުން މިދުވަހުގެ ތަޙުނިޔާ އަރިސް ކުރައްވަމުން އެމަނިކުފާނު ނެރުއްވި ބަޔާނެއްގައި ވިދާޅުވެފައިވަނީ ލިޔުންތެރިކަމަކީ ޙަޟާރަތެއްގެ ތަހުޒީބާއި ތަމައްދުންގެ މައި އަސާސު ކަމުގައެވެ.
"ލިޔުމާއި ނުލާ ހަރުދަނާ ނިޒާމެއް އެއްވެސް ހައިސިއްޔަތަކުން އެއްވެސް ނަޒަރަކުން ގާއިމެއް ނުވެތެވެ. ލިޔުމުގެ ނިޒާމެއްނެތި މީސްތަކުންގެ ޖަޒުބާތެއް ރަމްޒެއް ނުވެއެވެ." އަޝްރަފް ޢަލީ ވިދާޅުވިއެވެ.
މީގެއިތުރުން އަޝްރަފް ޢަލީ ވިދާޅުވީ "ލިޔުންތެރިކަމުގެ ދުވަސް" ފާހަގަ ކުރުމުގެ ގޮތުން ޖުލައި މަހުގެ 8 ވަނަ ދުވަސް ސަރުކާރުން ކަނޑައެޅުއްވީ، މިއީ ރާއްޖޭގައި ޗާޕު ކޮށްގެން ފުރަތަމަ ނެރުނު މަޖައްލާ "އަލްއިސްލާޙު" ގެ ފުރަތަމަ އަދަދު ނިކުތް ދުވަސް ކަމުގައިވާތީ ކަމަށެވެ.
"ލިޔުންތެރިންނަކީ މުހިންމު ބައެކެވެ. ޤައުމެއްގެ ތަރައްޤީއާއި ތަހުޒީބުގައި ލިޔުންތެރީން އަދާ ކުރާ ދައުރު ގުޅިފައިވަނީ މުޖުތަމަޢުގެ ވިންދާއެވެ. އާއްމު ރައްޔިތުންގެ ހިތާއެވެ. ޤައުމީ މަސްލަޙަތާއެވެ. އިޖުތިމާއީ އަދާލަތާއެވެ. މުޖުތަމައުގެ ސުލްޙަޔާއެވެ." ދިވެހި ބަހުގެ އެކެޑެމީގެ ރައީސް އަޝްރަފް ޢަލީ ވިދާޅުވެފައިވެއެވެ.
Ads by STO
