ކޮވިޑް އަށް ފައްސިވެފައިވާކަން އައިޖީއެމްއެޗުން އެންގިއިރު މައްޔިތާގާތު އާސަހަރާގައި އާއިލާއިން އުޅެފައިވޭ!
ކޮވިޑް-19 އަށް ފައްސިވީ ދިވެއްސަކު މިއަދު ނިޔާވެފައިވާއިރު، އޭނާ ނިޔާވިކަން އައިޖީއެމްއެޗުން އެއާއިލާއަށް އަންގާފައިވަނީ، މައްޔިތާ ނިޔާވެގެން ވަޅުލުމުގެ ކަންކަން އާސަހަރާގައި ކުރިއަށް ދަނިކޮށް ކަމަށް އެއާއިލާއިން ބުނެފިއެވެ.
އާއިލާގެ ފަރާތުން އޮންލައިން ނޫހެއް ކަމަށްވާ "ފެށުން" އަށް މައުލޫމާތު ދެމުން ވިދާޅުވެފައިވަނީ އަންހެންމީހާ ނިޔާވެފައިވާކަން މިއަދު ހެނދުނު އައިޖީއެމްއެޗް އަށް ގެންދިޔުމުން ޔަގީންކޮށްދީފައިވާ ކަމަށާއި އެހޮސްޕިޓަލަށް ގެންދިޔުމުގެ ތިން ގަޑިއިރު ކުރިން އުމުރުން 70 އަހަރުގެ އެއަންހެން މީހާ ނިޔާވެފައިވާ ކަމަށެވެ.
ކަށުކަމާކެމީގެ ކަންތައްތައް ކުރިއަށް ގެންދިއުމަށް އައިޖީއެމްއެޗުން އެމައްޔިތާ ދޫކޮށްލިކަމަށާއި، އެހެންކަމުން އޭނާގެ މޫނު ދެއްކުމުގެ ކަންކަމާއި ވަޅުލަން ތައްޔާރު ކުރުމުގައި ވެސް އާއިލާއިން ވެސް އާސަހަރާގައި ހަރަކާތްތެރިވި ބުނެފައިވެއެވެ.
ކޮވިޑް-19 އަށް އެމައްޔިތާ ފައްސި ވެފައިވާކަން އައިޖީއެމްއެޗުން އެންގުމުގެ ކުރިން ހޮސްޕިޓަލުގައި ވެސް މައްޔިތާ ކައިރީގައި އުޅުނު ކަމަށާއި، އެންގިއިރު ވެސް އާއިލާގެ މެންބަރުން ތިބީ އާސަހަރާގައި ކަމަށް ވެސް، އެއާއިލާއިން ބުނެފައިވެއެވެ.
"ޓެސްޓްގެ ނަތީޖާ ނުލިބެނީސް އައިޖީއެމްއެޗުން މައްޔިތާ ދޫކޮށްލީ ކީއްވެ؟ އެހޮސްޕިޓަލުގެ ފަރުވާ ކުޑަކަމުން އަހަރެމެން ޢާއިލާ މިވެއްޓުނީ ކިހާބޮޑު ރިސްކަކަށް" އެއާއިލާއިން މައުލޫމާތު ދީފައިވާ މީހާ ބުނެފައިވެއެވެ.
ކުރިއަށް އޮތް ތަނުގައި މިފަދަ ކަމެއް އެހެން އާއިލާއަކަށް ވެސް ވިޔަ ނުދިނުމަށްޓަކައި މިމައްސަލައިގައި ކަންތައްވީ ގޮތް ބަލަން ބޭނުންވާ ކަމަށް އެއާއިލާއިން ބުނެފައިވެއެވެ.
