ފެހެންދޫ ދަރިވަރުންގެ އާ ފެރީ ހަވާލުކޮށްފި

ފެރީ ރަސްމީކޮށް ހަވާލުކުރުމަށް މިއަދު ބޭއްވި ރަސްމިއްޔާތުގައި އިންޑިއާ ހައިކޮމިޝަނަރު ސަންޖޭ ސުދީރު އާއި ފޮރިން އަދި އެޑިޔުކޭޝަން މިނިސްޓްރީގެ އިސް އޮފިޝަލުންގެ އިތުރުން ރާއްޖޭގެ ފޮރިން މިނިސްޓަރު އަބްދުﷲ ޝާހިދު ބައިވެރިވެވަޑައިގެންނެވިއެވެ.

އެ ރަސްމިއްޔާތުގައި މިނިސްޓަރު ޝާހިދު ވިދާޅުވީ މިއަދު މި ނިމިގެންދިއަ މަޝްރޫއު އާއެކު ފެހެންދޫގެ ދަރިވަރުންނާއި ބެލެނިވެރިން އެތަކެއް އަހަރުތަކެއް ވަންދެން ތަހައްމަލު ކުރަމުންދިއަ ދަތި، އުނދަގޫ ހާލަތުން އަރައިގަނެވިފައިވާ ކަމަށެވެ.

އަދި މި މަޝްރޫއު އިން ހަމަހަމަަކަމައެކު ރާއްޖޭގެ އެކި ކަންކޮޅުތަކުގައި ތައުލީމު ހާސިލުކުރުމުގެ ފުރުސަތު ފަހިކޮށްދިނުމަށް މި ސަރުކާރުން ދެމުންދާ އަހައްމިއްޔަތުކަން ސާފުވެގެންދާކަމަށްވެސް ޝާހިދު އިތުރަށް ވިދާޅުވި އެވެ.

އެ ލޯންޗް ޑިޒައިންކޮށް އުފައްދާފައިވަނީ އިންޑިއާއިން ރާއްޖެއަށް ދިން 2.5 މިލިއަން ރުފިޔާގެ ގްރާންޓް އެހީގެ ދަށުން، އެގައުމުންނެވެ.

އެޑިއުކޭޝަން މިނިސްޓްރީން ބުނީ އެ ލޯންޗްގައި 30 ދަރިވަރުންގެ ޖާގަ އޮންނަ ކަަމަށެވެެ.

ފެހެންދޫއަކީ ވަަރަށް ކުޑަކުޑަ އާބާދީއެއް އޮންނަ ރަށެކެވެ. އާބާދީ މަދުވުމުން 2008 އިން ފެށިގެން ސްކޫލް ބަންދުކޮށްފައިވާތީ އެރަށުގެ ދަރިވަރުން ކިޔަވަންދަނީ އެ ރަށާ އެއް ފަޅެއްގައި އޮންނަ ބ. ގޮއިދޫގެ ސްކޫލަށެވެ.