އަލީ ވަހީދު ޖިންސީ ގޯނާގެ ވާހަކަތައް އަޑުއައްސަވާފައި ރައީސް ކީރިތިކުރެއްވި!
މިނިސްޓަރ އަލީ ވަހީދަށް ތުހުމަތު ކުރެވޭ ޖިންސީ ގޯނާގެ ވާހަކަ އަޑުއެއްސެވުމަށްފަހު ރައީސް އިބްރާހިމް މުހައްމަދު ސޯލިހު ކީރިތި ކުރެއްވި ކަމަށް ޓޫރިޒަމް މިނިސްޓްރީގެ އިސް އޮފިޝަލަކު ވިދާޅުވެއްޖެއެވެ.
އެނގިފައިވާ ގޮތުގައި ރައީސް ސޯލިހު އެ ކުއްލި ނިންމެވުން ނިންމެވީ، ޓުއަރިޒަމް މިނިސްޓްރީގެ މުވައްޒަފުންތަކެއް އަލީ ވަހީދުގެ މައްޗަށް ކުރި ސީރިއަސް ތުހުމަތުތަކެއްގެ އަޑު ހުދު ރައީސް އެ މުވައްޒަފުންގެ ފަރާތުން އެއްސެވުމަށް ފަހު އެވެ.
މިނިސްޓަރު އަލީ ވަހީދުގެ މައްޗަށް ކުރެވުނު ތުހުމަތުތަކާ ގުޅިގެން ޓޫރިޒަމް މިނިސްޓްރީގެ އޮފިޝަލަކާ ހަވާލާދީ "ރާއްޖެއެމްވީ" ގައި ރިޕޯޓު ކޮށްފައިވާ ގޮތުގައި އެ މިނިސްޓްރީގެ ގިނަ އަދަދެއްގެ އަންހެން މުވައްޒަފުންނަށް އަލީ ވަހީދު ޖިންސީ ގޯނާ ކުރައްވާފައިވާ ކަމަށެވެ.
އެގޮތުން އޮފީސް ތޭރެގައި މިނިސްޓަރުގެ ކެބިންއަށް އަންހެން ސްޓާފުން ގެންގޮސްގެންނާއި ރިސޯޓަށް ގެންގޮސްގެން މުވައްޒަފުންނަށް ޖިންސީ ގޯނާ ކުރައްވާފައިވާކަމަށް ތުހުމަތުކުރެވޭކަމަށް އޭނާ ވިދާޅުވިއެވެ. އަދި "ސީކްރެޓް ޗެޓުން" މުވައްޒަފުންނާއި ބަދު އަޚްލާގީ ވާހަކަތައް އަލީ ވަހީދު ދައްކަވާފައިވާ ކަމަށްވެސް މައުލޫމާތު ލިބެއެވެ.
"މި ވާހަކަތައް ކިޔައި ދިނުމުން ރައީސަށް އިނީ ރޮވިފައި. ބުނާނެ އެއްޗެއްވެސް ނޭނގިފައި،" ބައްދަލުވުމަށް ދިޔަ މުވައްޒަފަކާ ހަވާލާދީ އޮފިޝަލު ވިދާޅުވިއެވެ.
މަގާމުން އިސްތިއުފާ ދެއްވުމަށް އެންގެވުމުން އަލީ ވަހީދު މިރޭ ކުރެއްވި ޓްވީޓެއްގައި ވިދާޅުވީ، ތެދުވެރިކަމާއެކު ގައުމަށް ހިދުމަތް ކުރުމަށް ފުރުސަތު ލިބުނީތ ފަހުރުވެރިވާ ކަމަށެވެ. އަދި ވަގުތު ޖެހުމުން ހަގީގަތް ހާމަ ވާނެ ކަމަށް ޓްވީޓްގައި ވިދާޅުވެފައިވެ އެވެ.
