ތިއޮތީ ނުނިދިފަތަ؟ މިއޮތީ ހައްލު
ކޮންމެ ރެއަކު ނިދަން އަރާ އޮންނަތާ އެތައް އިރެއް ވާއިރު ވެސް ނިދި ނާންނަނީހެއްޔެވެ؟ ނިދަން އޮށޯތުމަށްފަހު އެއްފުށުން އަނެއްފުށަށް ޖެހިޖެހި ގަޑި ދެގަޑިއިރު ވާދެން އޮވެވޭ ހެއްޔެވެ؟ ލަހުން ނިދޭތީ ފަތިސް ނަމާދަށް ނުތެދުވެވެނީ ހެއްޔެވެ؟ ބައެއް މީހުނަށް ކިތަންމެ ފަސޭހައިން ނިދި އައި ކަމުގައި ވިޔަސް ނިދަން އުނދަގޫ މީހުން އަހަރެމެން ގެ ތެރޭގައި ނިކަން ގިނައެވެ. މި ހިމަނާލަނީ މިފަދަ މީހުން ފަސޭހައިން ނިދުމަށް މަގުފަހިކުރުވާ ބައެއް ކަންކަމެވެ.
މާގިނައިން ދުވާލު ނިދާކަމަށް ވާނަމަ، ރޭގަނޑު ނިދުމަށް ބުރޫއަރާނެ އެވެ. ޚާއްސަކޮށް އެމީހަކީ ނިދަން އުނދަގޫވާ މީހެއް ކަމުގައި ވާނަމަ (އިންސޮމްނިޔާގެ ޕޭޝަންޓެއް ނަމަ) އެންމެ ގިނަވެގެން 30 މިނެޓް މެންދުރު ގަޑީގައި ނިދަން ހޭދަކުރުން ބުއްދިވެރި އެވެ.
ހަމައެހެންމެ ނިދާ ގަޑިއާ މާކައިރި ވެފައިވަނިކޮށް ކަސްރަތު ނުކުރާށެވެ. ސަބަބަކީ އެގަޑީގައި މާބޮޑަށް އެނާޖައިޒް ވެފާ ހުންނާނެތީއެވެ. އެހެންކަމުން ތަންކޮޅެއް ކުރިން ކަސްރަތުކޮށް ނިންމާލާށެވެ. އާދަކޮށް ހެލިފެލިވެ އުޅުމުގެ ސަބަބުން، އޮށޯންނަ އިރަށް އަވަހަށް ނިދުމަށް އެހީވެދެއެވެ. އަދިހަމަ އެހެންމެ، ހިތްހަމަޖެހިގެން ފުން ނިންޖަކުން ނިދާލެވެއެވެ.
އަރާމު ނިންޖެއް ނިދާލުމަށްޓަކައި އަރާމު މާހައުލެއް ބިނާކުރުމަކީ ވެސް މުހިންމު ކަމެކެވެ. އަނދިރި، މަޑުމައިތިރި، އަދި މާ ހޫނު ނޫން މާހައުލެއް ބިނާކުރުމަށްޓަކައި ރޫމް ޑާކަނިންގްސް ޝޭޑް، އިއާ ޕުލަގްސް، އަދި ފަންކާ ބޭނުން ކުރެވިދާނެ އެވެ. މީގެ އިތުރުން ތިމާއަށް އެންމެ އަރާމްވާނެ ފަދަ ގޮދަޑިއަކާއި ބާލީސް ހިޔާރުކުރުން އެދެވިގެންވެއެވެ. އެހެންމީހަކާއެކީ އެނދު ހިއްސާކުރާނަމަ، ދެމީހުނަށްވެސް ތަން ކުޑަ ނުވާފަދަ ގޮތަކަށް އެނދު ބޭނުންކުރާށެވެ.
މާބޮޑަށް ކަންކަމާ ހާސްވެ ފިކުރު ބޮޑުވުމަކީ ވެސް ނިދަން އުނދަގޫ ވާ ކަމެކެވެ. މިކަން ހައްލު ކުރަން ބޭނުން ނަމަ ކުރަން ވިސްނާފައިހުންނަ ކަންތައްތައް ނުވެދާނެތީވެ ހާސްވެ ކަންބޮޑުވާނަމަ އެ ކަންތައްތައް ރަނގަޅަށް ރާވާލާށެވެ. ދޭތެރެ ދޭތެރެއިން ވަރުބަލި ފިލުވާލުމަށް ވަގުތު ހުސްކޮށްލާ ރައްޓެއްސަކާއެކު ވާހަކަ ދައްކާލާށެވެ. މާގިނަ ކަންތައް ކުރަން ހުރުމާއި، މާގިނަ ކަންތަކާ ވިސްނަން ޖެހުމަކީ ނިދަން އުނދަގޫ ވާނެ ކަންކަމެވެ. އެހެންކަމުން، މާދަމާ އަށް ކުރަން ހުރި ކަންތައްތައް ހިތުގައި ރާވާލައިފައި ހަމަޖެހިގެން ނިދަން ދާށެވެ.
މީގެ އިތުރުން ނިދާ ގަޑީގެ 30 މިނެޓު ކުރިން ފޯނާ ދުުރުވެލުމަކީ ވެސް ނިދަން ފަސޭހަކޮށްދޭ ކަމެއް ކަމުގައި މާހިރުން ބުނެއެވެ.
Ads by STO
