ޖޭޕީގެ ރައީސްކަމުން އަލީ ވަހީދު ވަކިކުރަން ހުށަހަޅައިފި!
ޖުމްހޫރީ ޕާޓީ (ޖޭޕީ) ގެ ރައީސް ކަމުން ޓޫރިޒަމް މިނިސްޓަރު އަލީ ވަހީދު ވަކި ކުރަން، އެޕާޓީން ވަކިކުރަން ކައުންސިލުގައި ވޯޓު ނެގުމަށް ހުށަހަޅައިފިއެވެ.
ޖޭޕީގެ ކައުންސިލަށް އެޕާޓީގެ ކައުންސިލު މެންބަރަކު ހުށަހެޅި ކުއްލި މައްސަލައެއްގައި ބުނެފައިވަނީ، ޓޫރިޒަމް މިނިސްޓަރުކަމުން އަލީ ވަހީދު އިސްތިއުފާ ދެއްވުމަށް ރައީސް އިބްރާހިމް މުޙައްމަދު ޞާލިޙު އަންގަވާފައިވުމުން، އެމަގާމުން އިސްތިއުފާ ދެއްވުމުން، ޖޭޕީގެ ރައީސްކަމުގެ މަގާމުން އޭނާ ވަކިކުރުމަށް ފެނޭތޯ ނުވަތަ ނުފެނޭތޯ ހުށަހަޅާ ކަމަށެވެ.
އަލީ ވަހީދު އެޕާޓީގެ ރައީސްކަމުން ވަކިކުރުމަށް ހުށަހަޅާފައިވަނީ އެޕާޓީގެ ރައީސް ކަމުގައި ހުންނަވައިގެން ޓްރާންސްޕޯޓް މިނިސްޓަރު އަދި ޖޭޕީގެ ލީޑަރ ގާސިމް އިބްރާހިމްގެ ހަގު އަނބިކަނބަލުން އައިޝަތު ނަހުލާއާއި ގުޅޭގޮތުން އަހްލާގީ މިންގަޑުންބޭރުވެ ބޭއަދަބީބަސްތައް ބޭނުންކޮށް ފުރައްސަރަކޮށްފައިވާ އޯޑިއޯތަކެއް ލީކުވި މައްސަލައަށް ފިޔަވަޅެއް ނޭޅި އުޅެނިކޮށް ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާކޮށްފައިވާ ކަމުގެ ތުހުމަތުތަކެއްވެސް މިހާރު އޭނާގެ މައްޗަށް ކުރެވިފައިވާތީ ކަމަށް ބުނެފައިވެއެވެ.
މިނިސްޓަރ ނަހުލާ އަކީ ޖޭޕީގެ ކައުންސިލު މެންބަރެއްވެސް މެއެވެ.
މީގެއިތުރުން އަލީ ވަހީދު އިސްތިއުފާ ދެއްވަން ރައީސް ޞާލިޙު އެންގެވި އެންގެވުމަކީ އޭނާގެ މައްޗަށް ކޮށްފައިވާ ޖިންސީގޯނާގެ ސީރިއަސް ތުހުމަތެއް ކަމަށް ބައްލަވާ، އޭނާ މިނިސްޓަރުކަމުން ވަކި ކުރުމަށް ރައީސްއަށް މަޖުބޫރުވުމަކީވެސް ޖޭޕީގެ ރައީސް ކަމުން އޭނާ ވަކިކުރުމަށް ހުށަހަޅާ ސަބަބެއް ކަމަށް އެމެންބަރު ބުނެފައިވެއެވެ.
