ސަރުކާރު ބަދުނާމުވެއްޖެ، ޒިންމާ ނަގަން ޖެހޭނީ ރައީސް ސޯލިހު: އާދަމް ޝަރީފް
މިނިސްޓަރ އަލީ ވަހީދަށް ތުހުމަތު ކުރެވޭ ޖިންސީ ގޯނާގެ ވާހަކަތަކާއެކު މި ސަރުކާރު މުޅިން ބަދުނާމު ވެއްޖެ ކަމަށް ޕީއެންސީގެ ޕީޖީ ގުރޫޕްގެ ލީޑަރު އަދި ކުރީގެ ޑިފެންސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.
އާދަމް ޝަރީފް މިއަދު ކުރެއްވި ޓްވީޓެއްގައި ވިދާޅުވީ ސަރުކާރު ބަދުނާމްވެ ނިމިއްޖެ ކަމަށެވެ. އަދި ކަންކަން މިހިސާބަށް ދިޔައީ ރައީސް ސޯލިހް އަޅުއްވަންޖެހޭ ފިޔަވަޅުތައް ދުރާލާ ނޭޅުވުމުން ކަން ފާހަގަކޮށް އޭނާ ވަނީ ފިޔަވަޅު ނޭޅުއްވުމުގެ މާނައަކީ އެކަމެއް ކުރަން ހިތްވަރު ދިނުން ކަމަށް ވިދާޅުވެފައެވެ.
"ޒިންމާ ނަގަންޖެހޭނީ ރައީސް ސޯލިހް. ގައުމުގެ އިޖުތިމާއީ ފޭރާން މިވަނީ މުޅިން ވީރާނާވެފައި،" އެކަމަށް އިޝާރާތް ކުރައްވައި އާދަމް ޝަރީފް ބުނެފައިވެއެވެ.
މަގާމުން އިސްތިއުފާ ދެއްވުމަށް އެންގެވުމުން އަލީ ވަހީދު ރޭ ކުރެއްވި ޓްވީޓެއްގައި ވިދާޅުވީ، "މިދުވަސްވެސް ހިނގައިދާނެ" ކަމަށާއި ތެދުވެރިކަމާއެކު ގައުމަށް ހިދުމަތް ކުރުމަށް ފުރުސަތު ލިބުނީތީ ފަހުރުވެރިވާ ކަމަށެވެ. އަދި ވަގުތު ޖެހުމުން ހަގީގަތް ހާމަ ވާނެ ކަމަށް ޓްވީޓްގައި ވިދާޅުވެފައިވެ އެވެ.
