ބޮޑެތި މައްސަލަތައް ބެލުމުގެ ޝައުގުވެރިކަން ސަރުކާރުގެ ހުރި ނަމަ ނިންމުންތައް އަވަސް ވީސް: ސައީދު
ބޮޑެތި މައްސަލަތައް ބެލުމުގެ ޝައުގުވެރިކަން ސަރުކާރުގެ ހުރި ނަމަ ނިންމުންތައް އަވަސް ވީސް ކަމަށް ޕީއެންސީގެ ނައިބް ރައީސް އަދި މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
މަސައްކަތުގެ މާހައުލުގައި ހިނގައިގެން ނުވާނެފަދަ އަހުލާގީ މައްސަލަތަކެއް ޓުއަރިޒަމް މިނިސްޓްރީގެ ތެރޭގައި ހިނގާފައިވާ ކަމުގެ ޝަކުވާއާއި ގުޅިގެން ޓޫރިޒަމް މިނިސްޓަރު އަލީ ވަހީދު އިސްތިއުފާ ދެއްވަން ރައީސް އިބްރާހިމް މުހައްމަދު ސޯލިހު ރޭ ވަނީ އަންގަވާފައެވެ.
މިކަމާ ގުޅިގެން ސައީދު ކުރެއްވި ޓްވީޓެއްގައި ވިދާޅުވީ ސަރުކާރުގެ އިސްވެރިންނަށް ކޮވިޑް-19ގެ ލޮކްޑައުން ވެގެން ދިޔައީ އިސްރާފު ބޮޑު އީދަކަށް ކަމަށެވެ.
"ދީނަށް ފުރައްސާރަ ކުރުން، ރޭޕް އަދި ބަންގުރަލުގެ މައްސަލަތައް ބެލުމުގައި ޝައުގުވެރިކަން ސަރުކާރުގެ ހުރި ނަމަ މި ނިންމުންތައް އަވަސް ވީސް." ސައީދު ވިދާޅުވިއެވެ.
Sarukaaruge isverinnah, Covid19 ge lockdown vegen dhiyaee israafu bodu eédhakah. Dheenah furassaara kurun, rape adhi banguraluge massalathah belumge shauguverikan sarukaaruge hurinama mi nimmunthah avas vees. https://t.co/2PVQx6nZye
— Mohamed Saeed (@em_saeed) July 8, 2020
ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ރައީސް އަލީ ވަހީދާ ގުޅޭ ގޮތުން ސީރިއަސް ތުހުމަތުތަކެއްކޮށް، އެ ވާހަކަތައް ރައީސް ސޯލިހާ ހިއްސާކުރީ، އިއްޔެ އެ އޮފީހުގައި ބޭއްވި ބައްދަލުވުމުގައެވެ. މި ބައްދަލުވުމުގައި ރައިސް އޮފީހުގެ ޗީފް އޮފް ސްޓާފް އަލީ ޒާހިރާއި އެ މިނިސްޓްރީގެ ސިޔަސީ މުވައްޒަފުންވެސް ވަނީ ބައިވެރިވެފައެވެ.
އަލީ ވަހީދު ޓޫރިޒަމް މިނިސްޓްރީގެ މުވައްޒަފުންނަށް ޖިންސީ ގޯނާ ކުރި ކަމަށް ތުހުމަތު ކުރެވޭ މައްސަލަ ފުލުހުން މިހާރު ދަނީ ތަހުގީގު ކުރަމުންނެވެ.
