ވެސްޓަން ޔޫނިއަންގެ ދިގު ކިޔޫ: އަންހެނުންނަކަށް ދިވެހިންނަކަށް ޚާއްސަ ކަމެއް ނެތް!
ކޮވިޑް-19 ފެތުރުމާއި ގުޅިގެން މާލެ ސަރަޙައްދު ފުރަބަންދު ކުރުމަށްފަހު މިހާރު ލުއިތަކެއް ދެވިފައިވާއިރު، ލުއިތަކާއެކު ވިލާ ޓްރެވެލްސް އިމާރާތުގައި ގާއިމް ކޮށްފައި ހުންނަ ވެސްޓަން ޔޫނިއަނުން ޚިދުމަތް ދެމުން އަންނަ ގޮތާއިމެދު ބައެއް ދިވެހިން ކަންބޮޑުވުން ފާޅު ކޮށްފިއެވެ.
އެގޮތުން އެއްފަހަރާ ގިނަ މީހުން އެއިމާރާތުގެ އެތެރެއަށް ނުވެއްދުމަށް ތާއީދު ކޮށްފައިވީ ނަމަވެސް، ވެސްޓަން ޔޫނިއަންގެ އެތެރެއަށް މީހުން ވައްދާ ގޮތާއިމެދު ގިނަ މީހުން (ޚާއްސަކޮށް ދިވެހީން) ހިތްހަމައެއް ނުޖެހެއެވެ.
އެގޮތުން އެތަނުގެ ބޭރުގައި ކިޔު ހަދަން ބުނެފައިވާއިރު، ކިޔުގައި ވަރަށް ގިނަ ބަޔަކު ތިބެން ޖެހެނީ އެކަކު އަނެކަކާއި ތަންކޮޅެއް ކައިރީގައެވެ. އިޖުތިމާއީ ގައިދުރުކަން އެކިޔޫގައި ގިނަ މީހުން، ޚާއްސަކޮށް ބިދޭސީން، އިސްކޮށްފައެއް ނުވެއެވެ. އަދި މިކަންކަން އިސްކުރޭތޯ ބަލަހައްޓާނެ މީހެއް ވެސް ވެސްޓަން ޔޫނިއަންގެ ފަރާތުން އެތަނުގައި ނުހުންނަކަން ގިނަ މީހުން ފާހަގަ ކޮށްފައިވެއެވެ.
މީގެއިތުރުން ގިނަ މީހުން ޖައްސާފައިވާ އެންމެ ބޮޑު އެއް މައްސަލައަކީ ކިޔޫގައި އަންހެނަކަށްވީތީ އަދި ދިވެއްސަކަށް ވީތީ ވެސް އެއްވެސް އިސްކަމެއް ވެސް އަދި ވަކި ކިޔުއެއްގައި ބޭތިއްބުމެއް ވެސް ނެތް ކަމެވެ.
"އިއްޔަ ވެސް އައިން މިތަނަށް. ބޭރު މީހުން ގިނަ ކަމުންނާއި ކިޔޫ ދިގުކަމުން މީހުންގަނޑު ތޮއްޖެހިފައި ހުރިވަރުން އަނބުރާލާފަ ގެއަށް ދިޔައީ މިއަދު ތަންކޮޅެއް ކުރިން އަންނަން. މިއަދު އައިސްފިން 11:00 ޖެހިއިރު. މިހާރު މިތާ ހުންނަތާ ދެ ގަޑިއިރު ވީއިރުވެސް މިއުޅެނީ އަދި ދޮރު ފެންނަވަރު ވެސް ނުވެގެން. ދެން މިތިބަ ބޭރުމީހުން، އައިސް ތިބެނީ ނޯށަށްވަދެ. ދުރަށް ޖެހުނަސް ކައިރިއަށް އާދޭ. އެމީހުން އެމީހުންނަށް ވެސް ތިބެނީ އެހާ ކައިރީގައި. މިކަންތައް ބޮޑުވެގެން މިހާރު މިތާހުރެ އެތެރޭގައި ތިބި މީހުންނަށް ގުޅަން ވެސް ގުޅާފައި ބުނެފިން ދިވެހިން ވެސް ހަމަ މިކިޔޫގަތޯ ތިބެންވީ، އަންހެނުންނަށް ވަކިން ބެލުމެއް ވެސް ނެތްތޯ. ބުނީ ހަމަ މިކިޔޫގަޔޯ ހުންނަން ޖެހޭނީ. މިއަށްވުރެ ރަނގަޅަށް ބެލެހެއްޓުން ރަނގަޅުވާނެ ކަމަށް ދެކެން. ވަކި ކިޔު އެއް ހަދާފަ ވިޔަސް. ވަކި އޯޑަރަކަށް ވެއްދި ދާނެއްނު އޭރުންވެސް." ނަންހާމަ ނުކުރުމަށް އެދި އެތަނުގައި ހުރި މީހަކު "ދެން" އަށް މައުލޫމާތު ދިނެވެ.
ވެސްޓަން ޔޫނިއަންގެ ބޭރުގެ ކަންކަން މިފަދައިން ހުރިކަމުގައި ވިޔަސް، އެތެރޭގައި ޚިދުމަތް ދެމުން ގެންދާގޮތް ރަނގަޅު ކަމަށާއި ރައްކާތެރިކަން ވެސް މީހުން ފާހަގަ ކޮށްފައިވެއެވެ.
މިދުވަސްކޮޅު އެތަނުން ޚިދުމަތްދެނީ ކޮންމެ ދުވަހަކު ހެނދުނު 9:00 ން ހަވީރު 17:00 އަށެވެ.
Ads by STO
