ޖިންސީ ގޯނާގެ ތުހުމަތުތަކާއެކު ގޭމްގެ އެސްޖީ މަގާމުގެ މަސްއޫލިއްޔަތު ތަކުން ދުރުކޮށްފި
ގެސްޓްހައުސް އެސޯސިއޭޝަން އޮފް މޯލްޑިވްސްގެ ސެކެރެޓަރީ ޖެނެރަލް ސައުދުﷲ އަހުމަދުގެ މައްޗަށް ކުރެވޭ ޖިންސީ ގޯނާގެ ތުހުމަތުތަކާއެކު އޭނާ މަގާމުގެ މަސްއޫލިއްޔަތުތަކުން ދުރުކޮށްފިއެވެ.
އެނގިފައިވާ ގޮތުން ސައުދުﷲގެ މައްޗަށް ކުރެވެނީ ގޭމްގެ އެޑްމިން ސްޓާފެއް ގޮތުގައި މަސައްކަތް ކުރާ އަންހެން ކުއްޖަކަށް ޖިންސީ ގޯނާ ކުރި ކަމުގެ ތުހުމަތެވެ. އެ އެސޯސިއޭޝަނުން "ސަން" އާ ވާހަކަދެއްކި މީހަކު ބުނީ އެ އަންހެން ކުއްޖާގެ ގުނަވަންތަކުގައި އަތްލައި އެކި ގޮތްތަށް ޖިންސީ ގޯނާ ކޮށްފައިވާ ކަމަށެވެ.
މިކަމާ ގުޅިގެން ގޭމް އިން ނެރުނު ބަޔާނެއްގައި ބުނީ އެ އެސޯސީއޭޝަންގެ އިންޓާނަލް އެފެއާޒް ކޮމިޓީއަށް ހުށަހެޅިފައިވާ މައްސަލައަކާ ގުޅިގެން މިއަދުން ފެށިގެން ވަކި ގޮތެއް އަންގަންދެން ސައުދުﷲ އެސްޖީގެ މަސްއޫލިއްޔަތުތަކުން ވަގުތީ ގޮތުން ވަކި ކުރެވިފައިވާ ކަމަށެވެ.
ސައުދުﷲ ވަނީ އޭނާގެ މައްޗަށް ކުރެވޭ ޖިންސީ ގޯނާގެ ތުހުމަތުތަކަށް އިންކާރު ކުރައްވާފައެވެ. އަދި އެ މައްސަލަ އަކީ އެކްޒެކްޓިވް ކޮމިޓީން އިސްނަގައިގެން ބަލަން ނިންމި މައްސަލައެއް ކަމަށްވާތީވެ، އަދި އެ މައްސަލަ ބަލަން އޭނާގެ ފުރިހަމަ އެއްބާރުލުން ދޭނެ ކަމަށް ސައުދު ވިދާޅުވިއެވެ. އަދި އެކަމުގެ ފުރިހަމަ ތަހުގީގެއް ހިންގައިފިނަމަ އޭނާގެ ކުށެއް ނެތްކަން ސާބިތުވާނެ ކަަމަށްވެސް ސައުދު ވިދާޅުވިއެވެ.
Ads by STO
