ހިޔާ ފްލެޓްތަކާ ގުޅޭ މައުލޫމާތު ސާފު ކުރުމަށް މުއިއްޒު ކޮމިޓީއަށް ހާޒިރު ކުރަނީ
ހުޅުމާލެ ދެވަނަ ފިޔަވަހީގައި އިމާރާތް ކުރާ ހިޔާ ފްލެޓްތަކާ ގުޅޭ މައުލޫމާތު ސާފު ކުރުމަށް ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު މަޖިލީހުގެ ކޮމިޓީއަށް ހާޒިރު ވާން އަންގައިފިއެވެ.
މަޖިލީހުގެ އަމީން އާންމު ސޮއި ކުރައްވާ މުއިއްޒު އަށް ފޮނުވި ސިޓީގައި ބުނެފައި ވަނީ ހިޔާ ފްލެޓްތަކާ ގުޅޭގޮތުން މައުލޫމާތު ސާފުކުރެއްވުމަށް މުއިއްޒުއާ ބައްދަލު ކުރެއްވުމަށް މަޖިލީހުގެ ގައުމީ ތަރައްގީއާ ތަރިކައިގެ ކޮމިޓީން ބޭނުންވާ ކަމަށެވެ.
އެ ބައްދަލުވުން ބޭއްވުމަށް ހަމަޖެހިފައިވަނީ މި މަހުގެ 16 ވާ ބުރާސްފަތި ދުވަހުގެ 11:00 ގައި ކަމަށް ވެސް އެ ސިޓީގައި ބުނެފައިވެއެވެ.
ރައީސް އަބްދުﷲ ޔާމިންގެ ސަރުކާރުން ފެށި ހިޔާގެ މަޝްރޫއުގެ 7000 ފްލެޓުގެ އަދަދު 6720 އަށް މަދުކޮށްފައިވާއިރު މީގެ ތެރޭގައި މުޅިން ވެސް ހުރީ، ދެ ކޮޓަރީގެ ފްލެޓްތަކެވެ.
ހިޔާ މަޝްރޫއު އިފްތިތާހް ކުރި ދުވަހު، އެކި ކުންފުނިތަކުން ފްލެޓު އަޅަން ނިންމައި އެކަން އިއުލާނު ކުރިއެވެ. މިތަންތަނުން ފްލެޓު ދޫކުރާނީ ކުންފުނިތަކުން، އެ ތަންތަނުގައި މަސައްކަތް ކުރާ މުވައްޒަފުންނަށެވެ. ކުންފުނިތަކުން އަޅަނީ 14 ބުރި އަދި 15 ބުރީގެ ޓަވަރު ތަކެވެ.
