މިންގަނޑުތަކާއި ޚިލާފަށް އަމަލުކުރާ މީޑިއާތައް ޖޫރިމަނާ ކުރެވޭނެ ގަވާއިދެއް ހަދަން މަޖިލިހުން އަންގައިފި
އަޚްލާގީ މިންގަނޑުތަކާއި ހަމަތަކާއި ޚިލާފަށް އަމަލުކުރާ މީޑިއާތައް ޖޫރިމަނާ ކުރެވޭނެ ޤަވާއިދެއް ހަދަން މޯލްޑިވްސް މީޑިއާ ކައުންސިލް (އެމްއެމްސީ) އަށް ރައްޔިތުންގެ މަޖިލީހުން އަންގައިފިއެވެ.
މަޖިލިހުގެ އަމީން އާއްމު ފާތިމަތު ނިއުޝާ ސޮއިކުރައްވާ އެމްއެމްސީ އަށް ފޮނުއްވި ސިޓީގައި ވިދާޅުވެފައިވަނީ ވަކި ގާނޫނެއްގެ ދަށުން ގަވާއިދު ހެދުމުގެ ބާރު ވަކި ފަރާތަކަށް ދީފައި ވާނަމަ، އެހެން ގޮތަކަށް އެ ގާނޫނުގައި ބަޔާންކޮށްފައި ނުވާހާ ހިނދަކު ގަވާއިދު ހެދުމަށް ދެވޭ ބާރުގެ ތެރޭގައި އެ ގަވާއިދާ ހިލާފު ވެއްޖެނަމަ 2،000 ރުފިޔާއަށްވުރެ ބޮޑު ނޫން އަދަދަކުން ޖޫރިމަނާ ކުރުމަށް އެގަވާއިދުގައި ހިމެނިދާނެ ކަމަށް، މާނަ ކުރުމުގެ ހަމަތައް ބަޔާން ކުރުމުގެ ގާނޫނުގައި ބުނެފައިވާ ކަމަށެވެ.
އެހެންކަމުން މީޑިއާތަކުގެ ހަމަތަކާއި އަހުލާގީ މިންގަނޑާ ހިލާފަށް އަމަލު ކުރާ މީޑިއާތަކާމެދު ގާނޫނުގައި ވާގޮތަށް ފިޔަވަޅު އެޅޭނެ އިޖުރާއަތު ބަޔާންކުރާ ގަވާއިދު އެކުކަވާލައި މިހިނގާ ޖުލައި މަހުގެ 8 ދުވަހުގެ (އިއްޔެ ގެ) ހެނދުނު 10:00 ގެ ކުރިން މަޖިލީހަށް ފޮނުވައި ދިނުމަށް، މިނިވަން މުއައްސަސާތަކުގެ ކޮމިޓީން އެދޭ ކަމަށްވެސް ސިޓީގައި ބުނެފައި ވެއެވެ.
އޮންލައިން ނޫސް "ވަން" އަށް މައުލޫމާތު ދެއްވަމުން މީޑިއާ ކައުންސިލުގެ ރައީސް ހިދާޔަތުﷲ ވިދާޅުވީ އެ ފަދަ ގަވާއިދެއް ހެދުމަށް އެދި ރައްޔިތުންގެ މަޖިލީހުން ސިޓީއެއް ފޮނުވާފައިވާ ކަމަށާއި އެއީ މަޖިލީހުގެ މިނިވަން މުއައްސަސާތަކާބެހޭ ކޮމިޓީއާއެކު ބޭއްވި ބައްދަލުވުމަކަށްފަހު ފޮނުވާފައިވާ ސީޓީއެއް ކަމަށް ވެސް ހިދާޔަތުﷲ ވިދާޅުވިއެވެ.
މީގެއިތުން ހިދާޔަތުﷲ ވިދާޅުވެފައިވަނީ އެމްއެމްސީން ގަވައިދަށް އިސްލާހު ގެންނަން ނިންމާނީ މެންބަރުންގެ މެދުގައި އެކަމާމެދު މަޝްވަރާކޮށް ފާސްކުރުމުން ކަމަށެވެ.
