ޒުވާބެއްގެ ތެރެއިން ފިރިމީހާ "މަރާލެވުނީ" ކަމަށް މިސްރުގެ އެކްޓްރެސް އެއް ބުނެފި!
މިސްރުގެ އެކްޓްރެސް އެއް އޭނާގެ ފިރިމީހާ މަރާލާފައި ފިލަން އުޅެނިކޮށް އެޤައުމުން ހައްޔަރު ކޮށްފިއެވެ.
އަބީރް ބޭބާސް ނަމަކަށް ކިޔާ މިއެކްޓްރެސް ވަނީ އަލްބަސާތީނު އަވަށުގައި އެދެމަފިރިން ދިރިއުޅޭ ގޭގައި، ފިރިމީހާއަށް ތޫނު އެއްޗަކުން ހަމަލާދީ މާރާލާފައި ކަމަށް ރިޕޯޓުތަކުން ހާމަ ކޮށްފައިވެއެވެ.
މިޚަބަރު ބަޔަކު ފުލުހުންނަށް ހުށަހެޅުމާއި ގުޅިގެން ފުލުހުން އެގެއަށް ދިޔައިރު އަބީރު ދިޔައީ ފިލަން ތައްޔާރުވަމުން ކަމަށް ވެސް، ކައިރޯ ފުލުހުންނާއި ހަވާލާދީ ރިޕޯޓުތަކުން ބުނެފައިވެއެވެ.
އަބީރު ހައްޔަރުކޮށް ސުވާލު ކުރުމުންް، އުމުރުން 29 އަހަރުގެ އެއެކްޓްރެސް ވަނީ ކުށަށް އިއުތިރާފު ވެފައެވެ. އަދި ބުނީ ފިރިމީހާ "މަރާލެވުނީ" ޒުވާބެއްގެ ތެރެއިން ކަމަށެވެ.
މީގެ އިތުރުން އަބީރު ބުނީ އޭނާގެ ފިރިމީހާ އޭނާއާއި ދިމާލަށް ހަޑިހުތުރު އެއްޗެހި ކިޔާ ކަމަށާއި އަނިޔާވެސް ކުރި ކަަމަށެވެ. އަދި އެހަމަނުޖެހުން ހިނގި ދުވަހު މާރާމާރީ ވެސް ހިންގާ، ކޮންޓްރޯލުން ނައްޓައިގެން އޭނާއަށް ފިރިމީހާ މަރާލެވުނީ ކަމަށް އަބީރު ބުންޏެވެ.
އަބީރު ދެއްކި ވާހަކަތަކަށް އެގޭގައި ގެންގުޅޭ މަސައްކަތު މީހާ ވެސް ވަނީ ހެކިބަސް ދީފައެވެ. ނަމަވެސް މިމައްސަލަ އިތުރަށް ތަހުގީގު ކުރުމަށް އޭނާ ވަނީ 15 ދުވަހަށް ބަންދު ކޮށްފައެވެ.
