ސަމާލުވޭ! ފައްސިވާ މީހުންގެ ކޮންޓެކްޓްސްތައް ދަނީ އިތުރުވަމުން: ޑރ. އަފްޒަލް
ނިއު ނޯމަލްގައި އުޅުމަށް ދޫކޮށްލުމާ ގުޅިގެން ފައްސިވާ މީހުންގެ ކޮންޓެކްޓްސް އިތުރުވަމުންދާ ކަމަށް ޑރ. އިބްރާހިމް އަފްޒަލް ވިދާޅުވެއްޖެއެވެ.
ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. އިބްރާހީމް އަފްޒަލް ވިދާޅުވީ، ލުއިދިނުމާއެކު އާންމުންގެ ހަރަކާތްތަކުން ފެނިގެންދަނީ އިހުގެ ދިރިއުޅުމުގެ ތެރެއަށް ދިޔަ މަންޒަރު ކަމަށެވެ.
"އަޅުގަނޑުމެންގެ ހަރަކާތްތައް މިހާރު ލުއި ދިނީމާ ވަރަށް ގިނަ ބަޔަކު އެކަން އެބަ ހަނދާން ނެތޭ. މިހާރު އަނެއްކާ ވެސް އިހު އޮތް ގޮތަށް ދިޔައީ ކަމަށް ހިތައި އެބޭފުޅުންގެ ހަރަކާތްތަކުން ފެންނަނީ އެއްވެސް ވަރަކަށް ބަލާލުމެއްނެތި އުޅޭ ތަން. އެހެންވީމާ އެހެން ދާން ފަށާފައި ނަމަ މިފަދަ މަންޒަރުތައް ފެންނާނެ. މިހާރު އަޅުގަނޑުމެންގެ ކޮންޓެކްޓްސްތައް މިދަނީ އިތުރުވަމުން،" ޑރ. އަފްޒަލް ވިދާޅުވި އެވެ.
ޑރ. އަފްޒަލް ވަނީ ފުލްކޮށް ލުއިދީފައި އޮތްނަމަވެސް އަދިވެސް ބޭރަށް ނިކުން ރަނގަޅީ ޒަރޫރީ ބޭނުމެއްގައި ކަމަށާއި އެގޮތުން ބޭރަށް ނިކުންނައިރު ވެސް މާސްކް އެޅުން މުހިއްމު ކަމަށެވެ. އަދި ބޭރުތެރޭގައި އުޅޭ އުޅުމުގަޔާއި އެހެން މީހުންނާއި ބައްދަލުވާއިރު ރައްކާތެރިކަމުގެ ފިޔަވަޅުތައް އަޅައިގެން ހުރުމަށް ޑރ. އަފްޒަލް ވަނީ އިލްތިމާސް ކުރައްވާފަ އެވެ.
އެ ބައްދަލުވުމުގައި ވާހަކަ ދައްކަވަމުން ޑރ. ނަޒްލާ ރަފީގް ވިދާޅުވީ، ބަލީގެ އެއްވެސް އަލާމާތެއް ހުރި މީހެއް ނަމަ ފުލޫ ކްލިނިކަށް ދިއުމަށް ނޫން ގޮތަށް ބޭރަށް ނިކުމެގެން ނުވާނެ ކަމަށެވެ.
