ބަލާލަން ކުޑަޔަސް، މީ ކުޑަ ކުއްޖެއް ނޫން
ފެންނަ ފެނުމަށް ކިތަންމެ ބޮޑު މީހަކު ވެސް އުމުރުން ކުޑަ ވެދާނެއެވެ. ނުވަތަ ކުޑަ މީހަކު ވެސް އުމުރުން ދޮށި ވެދާނެއެވެ. އަދި ބައްޔެއްގެ ސަބަބުން ތިމާގެ އުމުރަށް ވުރެ ހަގު ކަމަށް ނުވަތަ ދޮށި ކަމަށް ދެއްކުމަކީ ވެސް ވަމުން އަންނަ ކަމެކެވެ.
މިއީ ވެސް އެފަދަ ބައްޔެއްގެ ސަބަބުން އުމުރާއި އެއް ވަރަށް ބޮޑުނުވެވޭ އަންހެނެކެވެ. ދުނިޔޭގެ އެންމެ ކުޑަ އަންހެންމީހާގެ ގޮތުގައި މަޝްހޫރުވެފައިވާ އުމުރުން 26 އަހަރުގެ ޖޯތީ އަމްގޭ ގެ އިސްކޮޅުގައި ދެ ފޫޓޫ ހުންނަ އިރު ބަރުދަނުގައި ހުންނަނީ 5.44 ކިލޯއެވެ.
އިންޑިއާ އަށް އުފަން ޖޯތީގެ ގައުމުގައި ބައެއް މީހުން އޭނާއަކީ ކަލަކު ކަމަށް ބުނެ އުޅޭ ނަމަވެސް ޖޯތީ އެކަހަލަ އެއްވެސް ކަމެއް ނުކެރެއެވެ.
ޖޯތީ މަންމަ ބުނެފައިވާ ގޮތުގައި އެންމެ ކުޑައިރުއްސުރެ ޖޯތީ ބޭނުންވަނީ އެކްޓަރަކަށް ވާށެވެ. އަދި އެ ހުވަފެން ހަގީގަތަކަށް ހެދުމަށް ޖޯތީ ކުރަމުން އައި މަސައްކަތް އޭނާ ވަނީ ހަގީގަތަކަށް ވެސް ހަދާފައެވެ.
ހޮލީވުޑް ޝޯ އެއް ކަމަށްވާ 'އެމެރިކަން ހިސްޓަރީ ސްޓޯރީސް' އިން ޖޯތީ ވަނީ ގިނަ ބައެއްގެ މަގުބޫލުކަން ހޯދާފައެވެ.
ކިތަންމެ ކާމިޔާބުވެފައި އުފާވެރި ނަމަވެސް ޖޯތީ ގެ ހަޔާތުގައި ވެސް ހިތާމަތަކެއްވެއެވެ.
އެގޮތުން ޖޯތީ ބުނެފައިވާ ގޮތުގައި އޭނާ ބޭރަށް ދާން ބިރުގަނެއެވެ. އަދި މަގުމަތީގައި ހިނގާއިރު ވެސް އެހެން މީހުނަށް އޭނާއެއް ނުފެނެއެވެ. އަދި އަބަދުވެސް މީހަކު ފައިން އަރާފާނެ ކަމުގެ ބިރު އޭނާގެ އޮވެއެވެ.
"ބައެއް ފަހަރު ހިތަށް އަރާ މި ދުނިޔެއަކީ އަހަރެންނަށް އޮތް ތަނެއް ނޫނޭ" ޖޯތީ ބުނެފައިވެއެވެ.
Ads by STO
