ކޮވިޑް19 ބަލިމަޑުކަމުގެ ތެރޭގައި ހިތް ހުއްޓޭ މީހުންގެ އަދަދު ގިނަވެއްޖެ
ކޮވިޑް19 ގެ މި ބަލިމަޑުކަމުގެ ތެރޭގައި 'ބްރޯކެން ހާޓް ސިންޑްރޯމް' ނުވަތަ ހިތް ހުއްޓުނު މީހުން އަދަދު އިތުރުވެފައިވާ ކަަމަށް ދިރާސާއަކުން ދައްކައިފިއެވެ.
ބުރާސްފަތި ދުވަހު ޝާއިއުކުރި މި ދިރާސާއިން ދައްކާ ގޮތުގައި ކޮވިޑް19 ނުޖެހޭ މީހުންވެސް، ހިތް ހުއްޓޭ ސިންޑްރޯމް ގެ ޝިކާރައަކަށް ވަމުން އަންނަ ކަމަށެވެ. އަދި މަކުގެ ސަބަބުތަކެއް ގެ ގޮތުން އެ ދިރާސާގައި ވަނީ ބަލިމަޑުކަމުގެ ސަބަބުން ކުރިމަތިވެފައިވާ އެކި ކަހަލަގެ ސްޓްރެސްތައް ފާހަގަކޮށްފައެވެ.
"ސްޓްރެސް ކާޑިއޯމިޔޯޕަތީ" ނުވަތަ "ބްރޯކެން ހާޓް ސިންޑްރޯމް" އަކީ ހިތްބަންޑުންވާ ވަރުގެ އުފާވެރިކަމެއް ނުވަތަ ހިތުގައި ވޭން އަޅާ ވަރުގެ ފުން ހިތާމައެއް ނުވަތަ ބިރުވެރިކަމެއް ވެރިވާ ހިނދު، ހިތުގެ މަސްތަކުގެ ބާރުދެރަވެ، ހިތުގެ ޗެމްބަރ އެއް ކަމަށްވާ ވާތު ވެންޓްރިކަލް އޭގެ ބައްޓަން ބަދަލުވުމާއި ގުޅިގެން ހިތް އޭގެ ވާޖިބު އެންމެ ފުރިހަމަ އަށް އަދާނުކުރެވުމުގެ ސަބަބުން ދިމާވާ ކަމެކެވެ.
ބްރޯކެން ހާޓް ސިންޑްރޯމް ޖެހުމުން ފެންނަ ބައެއް އަލާމާތްތަކުގެ ތެރޭގައި މެޔަށް ތަދުވެ، ނޭވާ ކުރުވުން ހިމެނެއެވެ. އަލާމާތްތަކުގައި ހާޓް އެޓޭކަކާއި ވައްތަރު ނަމަވެސް މި މައްސަލަ ދިމާވަނީ ލޭނާރު ތައް ބެދިގެންނެއް ނޫނެވެ.
މެޑިކަލް ޖާމާ ނެޓްވޯކް އޯޕެން ގައި ޝާއިއުކޮށްފައިވާ މި ދިރާސާއިން އިތުރަށް ދައްކާ ގޮތުގައި ބަލިމަޑުކަމުގެ ސަބަބުން ހިތް ހުއްޓޭ މި ސިންޑްރޯމް ޖެހުމުގެ ފުރުސަތު ދެ ގުނަ އިތުރުވެގެންދެއެވެ.
