ޖާބިރުގެ ޝުކުރު ކައި އަށް: ގައުމު އިޝްތިހާރު ކުރުމަށް ތިކުރައްވާ މަސައްކަތަށް ޝުކުރުވެރިވަން
އިންސްޓަގްރާމް މޮޑެލް ކައިޒީން އަށް ޑީއާރުޕީގެ ލީޑަރު އަދި ކާށިދޫ ދާއިރާގެ މެންބަރު އަބްދުﷲ ޖާބިރު ވަރަށް ބޮޑަށް ތައުރީފުކުރައްވައިފިއެވެ.
އެގޮތުން ޑީއާރުޕީ އިން މިއަދު ކުރެއްވި ޓްވީޓެއްގައި ވަނީ ކޮވިޑް19 ގެ މިހާލަތުގައި، ކައި އޭނާގެ އިންސްޓަގްރާމް ފޭނުންނަށް ދެއްވި ހަދިޔާ އަކީ، އެފަދަ އެހެން ސެލެބްރިޓީއިން ނަމޫނާ ނަގަންޖެހޭ ވަރު ގެ ކަމެއް ކަމަށް ޖާބިރު ވިދާޅުވެފައިކަމަށެވެ.
ހަމައެހެންމެ ރާއްޖެ އިޝްތިހާރުކުރެއްވުމަށް ކައިޒީން ކުރައްވާ މަސައްކަތަށް ވެސް ޖާބިރު ވަނީ ޝުކުރުއަދާކޮށްފައެވެ.
"ކައިޒީން އާ އެހެން ސެލެބްރިޓީ އިން ގައުމު އިޝްތިހާރު ކުރުމަށް ތިކުރައްވާ މަސައްކަތަށް ޝުކުރު ދަންނަވަން" ޖާބިރު ވިދާޅުވެފައިވެއެވެ.
ގިނަ ބައެއްގެ މަގުބޫލުކަން ހޯދާފައިވާ ކައި ވަނީ އޭނާގެ އިންސްޓަގްރާމް ގައި 100 ހާސް ފޮލޮވާސް ހަމަވުމުގެ އުފަލުގައި ދީލަތި ގިވްއަވޭ އެއް ބާއްވާފައެވެ. އަދި މި ގިވްއަވޭ ދިނުމުގައި އެންމެ ބޭނުން ޖެހިފައިވާ މީހުނަށް އިސްކަން ދިނުމުގެ ސަބަބުން ކައި އަށް ގިނަ ބައެއްގެ ލޯބި ލިބިގެންދިޔައެވެ.
އޭގެ އިތުރުންވެސް ގިވްއަވޭ ގެ ނަސީބުވެރިންގެ ތެރެއިން ކޮންމެ ނަސީބުވެރިޔަކަށް ދިން 1000 ޑޮލަރުގެ އިތުރުން ކައި ވަނީ ބޭނުންޖެހިފައިވާ އިތުރު ފަރާތަކަށް ފުރޮޅުލީ ގޮނޑިއެއްވެސް ހަދިޔާކޮށްފައެވެ.
Ads by STO
