ރައީސް އޮފީހުގެ ކޮމިއުނިކޭޝަންސް ޑިރެކްޓަރު ނޫސްވެރިއަކަށް ޖިންސީ ފުރައްސާރަ ކުރި މައްސަލަ ދަނީ ތަހުގީގު ކުރަމުން: ސީޕީ
ރައީސް އޮފީހުގެ ކޮމިއުނިކޭޝަންސް ޑިރެކްޓަރު ހަސަން އިސްމާއިލްގެ މައްޗަށް ކުރެވޭ ޖިންސީ ފުރައްސާރައިގެ ތުހުމަތު ތަހުގީގު ކުރަމުންދާ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ރައީސް އޮފީހުގެ ކޮމިއުނިކޭޝަން ޑިރެކްޓަރު ހަސަން އިސްމާއީލް އަށް މި ތުހުމަތުތައް ކުރަނީ "މިހާރު" ނޫހުގެ އިނގިރޭސި ވާޝަން "ދި އެޑިޝަން" ގައި މަސައްކަތް ކުރާ ނޫސްވެރިއެއްކަމަށްވާ ރާއީ މުނައްވަރެވެ. އޭނާ ވަނީ، ހަސަން އިސްމާއިލްގެ ޖިންސީ ފުރައްސާރައިގެ މައްސަލައެއް ރައީސް އޮފީހާއި، ފުލުސް އޮފީސް އަދި އޭސީސީ އަށް ހުށަހެޅި ކަމަށްބުނެ ޓުވީޓުކޮށްފައެވެ.
އަދި އެ މައްސަލަ ހުށަހެޅީ 4 ފެބްރުއަރީ 2020 ގައި ކަމަށާއި މިއަދާއި ހަމައަށް އެއްވެސް ފިޔަވަޅެއް އަޅާފައި ނުވާއިރު، ފިޔަވަޅެއް ނޭޅިގެން އުޅެނީ ކީއްވެތޯ، ރައީސް ސޯލިހަށް އަމާޒުކޮށް އޭނާ ޓުވީޓުކޮށްފައިވެއެވެ.
ރައީގެ ޓްވީޓަށް ޖަވާބު ދެއްވަމުން ސީޕީ ހަމީދު މިއަދު ވިދާޅުވީ ފުލުހުންގެ ޓީމާ ސުވާލު ކުރުމުން އެ މައްސަލަ ތަހުގީގު ކުރަމުންދާ ކަމަށް ބުނެފައިވާ ކަމަށެވެ. އަދި އެ މައްސަލައިގެ ތަހުގީގު އަވަސްކޮށް ދެއްވުމަށް ސީޕީ ހަމީދު އެދިވަޑައިގެންފައިވާނެ ކަމަށް ވިދާޅުވިއެވެ.
ހަސަން އިސްމާއިލްގެ މައްޗަށް ޖިންސީ ފުރައްސާރައިގެ ތުހުމަތު މީގެ ކުރިންވެސް ކުރެވުނެވެ. ހަސަން އިސްމާއިމް މިފަހަރު ޖިންސީ ފުރައްސާރަ ކުރި ރާއީ އަކީ ކުރިން އެޓާނީ ޖެނެރަލްކަން ކުރެއްވި އަދި އެމްޑީޕީގެ ރައީސްކަންވެސް ކުރެއްވި ޑރ. މުހައްމަދު މުނައްވަރުގެ ދަރިކަނބަލުންނެވެ.
