އެމްޑީ އާދަމް އާޒިމާއި ޑިރެކްޓަރުންގެ މައްޗަށް ބޮޑެތި ތުހުމަތު ތަކެއް ، ވަޒީފާއިން ބޭރުކޮށްލީ އޮޑިޓް މެނޭޖަރ
ދިވެހި ސަރުކާރުގެ ފެން ކުންފުނި، މާލޭ ވޯޓަރ އެންޑް ސުވަރެޖް ކޮމްޕެނީ ޕްރައިވެޓް ލިމިޓެޑް (އެމް.ޑަބުލިޔޫ.އެސް.ސީ.) ގެކުރީގެ އޮޑިޓް މެނޭޖަރ އަލްފާޟިލް މޫސާ ނަސީމް ކުއްލިގޮތަކަށް 05 ނޮވެމްބަރ 2019 ގައި ވަޒީފާއިން ވަކިކުރީ، މެނޭޖިންގ ޑައިރެކްޓަރ އާދަމް އާޒިމާއި، އޮޑިޓް ކޮމިޓީ މެންބަރުންނާއި ބައެއް ޑިރެކްޓަރުންގެ މަސްލަހަތުހުރި އޮޑިޓްތަކެއް ކުރިޔަށްގެންދާތީވެ، އެއިން ނިކުމެދާނެ ނުރަނގަޅު ނަތީޖާއަކުން ސަލާމަތް ވުމަށްޓަކާ ކަމަށް މޫސާ ނަސީމްގެ ލީގަލް ކައުންސިލް އަލްއުސްތާޒް ޢަބުދުﷲ ޢަލީ ވިދާޅުވެއްޖެއެވެ.
އެމް.ޑަބުލިޔޫ.އެސް.ސީ. ގެ ކުރީގެ އޮޑިޓް މެނޭޖަރ ލ. ގަމު ނޫވިލާގެ މޫސާ ނަސީމްގެ މިމައްސަލައިގެ ލީގަލް ކައުންސިލް އަލްއުސްތާޒް ޢަބުދުﷲ މިފަދައިން ވިދާޅުވީ 7 ޖުލައި 2020 ގައި އިންފޮމޭޝަން ކަމިޝަންގެ އޮފީހުން، ޒޫމް މެދުވެރިކޮށް ވާޗުއަލްކޮށް، އަދި ޢާއްމުކޮށް ހުޅުވާލައިގެން ބޭއްވި ޝަރީޢަތުގެ އަޑުއެހުމުގައި މޫސާ ނަސީމްގެ ދިފާޢުގައި ވާހަކަފުޅު ދައްކަވަމުންނެވެ.
" މި މައްސަލާގައި، މޫސާ ނަސީމް ވަޒީފާއިން ވަކިކުރި މައްސަލައިގެ އެކޮޅާއި، މިކޮޅާއި މެދުތެރެއަށް ބަލާއިރުގައި، މި މައްސަލާގައި މޫސާ ނަސީމް ވަޒީފާއިން ވަކިކޮށްފައި މިވަނީ ހަމަ ކަނޑައެޅިގެން އެމް.ޑަބުލިޔޫ.އެސް.ސީ.ގެ އެތެރޭގެ އޮޑިޓެއް ކުރަމުންއައި ވަޤުތެއްގައި. އަދި ވަކިން ޚާއްޞަކޮށް ދެންމެ މޫސާ ނަސީމްވެސް އެފާހަގަކުރި ފަދައިން، އެންޓި ކޮރަޕްޝަން ކަމިޝަނުން ބޭނުންވި އޮޑިޓް ރިޕޯޓްތަކެއް އެކޮމިޝަނާއި ޙިއްސާކުރި ވަޤުތެއްގައި. އެހެންވީމާ، އޮޑިޓް ކޮމިޓީގައި ތިއްބެވި މެމްބަރުންނާ ނުވަތަ ޑިރެކްޓަރުންނާ ސީދާ ގުޅުންހުރި ކަމެއް އޮޑިޓްކޮށްގެން އެއިގެން ނިކުމެދާނެ ނަތީޖާއަކުން ނުވަތަ އެއިގެން ނިކުމެދާނެ ނުރަނގަޅު ނަތީޖާއަކުން ސަލާމަތް ވުމަށްޓަކާ މޫސާ ނަސީމް ކުއްލި ގޮތަކަށް ވަޒީފާއިން ވަކި ކުރީ" އަޑުއެހުމުގައި ވަކީލް ޢަބުދުﷲ ވިދާޅުވިއެވެ.
މިމައްސަލާގައި މަޢުލޫމާތު ހޯދުމާއި ލިބިގަތުމުގެ ޤާނޫނުގެ ދަށުން ހޯދަން މިއުޅޭ ރިޕޯޓަށް ބިނާކޮށް ކަމަށާއި އެރިޕޯޓަކީ މޫސާ ނަސީމަށް ވަރަށް މުހިންމު ރިޕޯޓަކަށް ވާތީ، މިޤާނޫނުގެ ދަށުން އިންފޮމޭޝަން ކަމިޝަނަރ މިރިޕޯޓް އެމް.ޑަބުލިޔޫ.އެސް.ސީ. އިން މޫސާ ނަސީމަށް ފޯރުކޮށްދޭންޖެހޭނެކަމަށް ކަނޑައަޅައިދިނުމަށް އެދިވަޑައިގަތެވެ.
މިއަޑުއެހުން ނިމިގެން ދިޔައީ، މޫސާ ނަސީމްގެ ލީގަލް ކައުންސެލުން މިއެދިވަޑައިގެންނެވި ފަދައިން، ވަޒީފާއިން ވަކިކުރަން ނިންމި ނިންމުން ބިނާކުރި އެކުންފުނީގެ އޮޑިޓް އެންޑް ރެމިއުނެރޭޝަން ކޮމިޓީގެ 'ތަހުޤީޤީ ރިޕޯޓް' އެމުއައްޒަފަށް ދޫކުރަން ޖެހޭނެކަމަށް ކަނޑައަޅައި ނިންމައި އެމް.ޑަބުލިޔޫ.އެސް.ސީ.ގެ މައްޗަށް އަމުރުކޮށްފައެވެ. މިކަމަށް އެމް.ޑަބުލިޔޫ.އެސް.ސީން ދެން އިންކާރު ކުރާނަމަ ޖެހޭނީ ދިވެހި ރާއްޖޭގެ ހައި ކޯޓްގައި އިންފޮމޭޝަން ކަމިޝަނަރގެ މި ނިންމުން އިސްތިއުނާފު ކުރާށެވެ.
މަޝްހޫރު ޤާނޫނީ ވަކީލު ޝަހުދީ ލީޑްކުރެއްވި އެމް.ޑަބުލިޔޫ.އެސް.ސީ.ގެ ވަކީލުންގެ ޓީމުގައި 4 ވަކީލުން ތިއްބެވި ނަމަވެސް މޫސާ ނަސީމްގެ މި ދަޢުވާގެ ދިފާޢުގައި އެމް.ޑަބުލިޔޫ.އެސް.ސީ ގެ ޓީމުން ނެގި ހަމައެކަނި ނުކުތާއަކީ ދިވެހި ސަރުކާރުގެ 80 އިންސައްތަ ހިއްސާ އޮންނަ އެކުންފުންޏަކީ މަޢުލޫމާތު ހޯދުމާއި ލިބިގަތުމުގެ ޤާނޫނުގައި ބަޔާންކޮށްފައި ވާފަދަ "ދައުލަތުގެ މުއައްސަސާއެއް" ކަމުގައި އެބޭފުޅުން ޤަބޫލު ނުކުރައްވާތީ އެރިޕޯޓް މޫސާ ނަސީމަށް ފޯރުކޮށްދިނުމަށް އިންކާރުކުރާ ކަމަށެވެ. ނަމަވެސް ޝަރީޢަތް ނިމިގެން ދިޔައީ، މަޝްހޫރު ޤާނޫނީ ވަކީލު ޝަހުދީގެ ނުކުތާގައި އެއްވެސް އަސާސެއް ނެތްކަމަށް ސާބިތުވެގެންނެވެ.
ހަމަ މިއަޑުއެހުމުގައި، މޫސާ ނަސީމް ވަނީ، އެކުންފުނީގެ ކުރީގެ މެނޭޖިންގ ޑިރެކްޓަރ އާދަމް އާޒިމާއި، އެކުންފުނީގެ ކުރީގެ މެނޭޖަރުން އަދި މިހާރުގެ ބޯޑްގައި ތިއްބެވި ބައެއް ޑިރެކްޓަރުންނާއި ކޮމްޕެނީ ސެކްރެޓަރީ ގެ މައްޗަށް ކޮރަޕްޝަނާއި މަޤާމުގެ ނާޖާއިޒް ފައިދާ ނެގުމާއި އެބޭފުޅުންގެ މަސްލަޙަތު ފުށުއަށާ އޮޑިޓްތަކެއް ކުރިޔަށް ގެންދިޔަ ނުދީ ހިފެހެއްޓުމާއި އަދި އެކަމަށް އެބޭފުޅާއަށް ޕްރެޝަރު ކުރުމަށްޓަކައި، ޤަވާޢިދާއި ޚިލާފަށް ޑިރެކްޓަރުންގެ ބޯޑާއި އޮޑިޓް ކޮމެޓީގެ ބައްދަލުވުންތަކެއް ބޭއްވެވި ކަމުގެ ބޮޑެތި ތުހުމަތު ތަކެއް ކުރައްވާފައެވެ.
މޫސާ ނަސީމް ވިދާޅުވި ގޮތުގައި ، 05 ނޮވެމްބަރ 2019 ގައި އެބޭފުޅާގެ އިތުބާރު ނެތްކަމަށް ފާސްކުރި އިރު، ހަމަ 2019 ވަނަ އަހަރުގެ ޖުލައި 17 ވަނަ ދުވަހާއި ހިސާބަށް އެބޭފުޅާގެ މަސައްކަތާއި ދޭތެރޭ އެމް.ޑަބުލިޔޫ.އެސް.ސީ ގެ ބޯޑުންނާއި، އޮޑިޓް ކޮމެޓީން އަދި މެނޭޖުމަންޓުގެ އިތުބާރު އޮތްކަމަށް ލިޔެކިއުންތަކުން ސާބިތުވާން އެބަހުއްޓެވެ. އަދި މިއަޑުއެހުމުގައި އެބޭފުޅާވަނީ މިކަން ސާބިތުކުރުމަށް ލިޔެކިއުންތައް ޝަރީޢަތުގެ މަޖުލިހަށް ހުށައަޅުއްވާފައެވެ. ޚާއްސަ ގޮތެއްގައި އެބޭފުޅާގެ އިތުބާރުނެތްކަމަށް ފާސްކުރި އޮޑިޓް ކޮމެޓީގެ ޗެއަރމަން 17 ޖުލައި 2019 ގައި އެބޭފުޅާގެ މަސައްކަތަށް ތަޢުރީފުކޮށް ދެއްވާފައި އޮތް ލިޔުމެއް ހުށަހަޅާފައިވެއެވެ.
17 ޖުލައި 2019 އާއި 5 ނޮވެމްބަރ 2019 ދެމެދު މޫސާ ނަސީމްގެ އިތުބާރު ނެތްކަމަށް އޮޑިޓް ކޮމެޓީން ފާސްކުރަން ނިންމަން މަޖުބޫރުވީ، ލީގަލް ކައުންސިލުން ވެސް ފާހަގަ ކުރިގޮތަށް އޭނާ ކުރިޔަށް ގެންދެވި އޮޑިޓްތަކަށް ނުފޫޒް ފޯރުވައި ހުއްޓުވުމަށްޓަކައި ކަމަށް ތަކުރާރުކޮށް މޫސާ ނަސީމް ވިދާޅުވެފައި ވެއެވެ.
ސަރުކާރުގެ ފެން ކުންފުނީ ގައި ޚިދުމަތްކުރާތާ ނުވަ އަހަރުވެފައި ވަނިކޮށް އަދި މި ދިގު މުއްދަތުގައި ދުވަހަކުވެސް ކުންފުނީގެ ފަރާތުން އެއްވެސް ނަސޭޙަތެއް، އިންޒާރެއް ދީފައި ނެތީސް ހަމައެހެންމެ ހާޒިރީ، އަޚްލާޤީ ނުވަތަ ޕާރފޯމަންސްގެ ވެސް އެއްވެސް ކަހަލަ ނުރަނގަޅު ރެކޯޑެއް މި މުއްދަތުގައި ނެތީސް، 5 ނޮވެމްބަރ 2019 ގައި ވަޒީފާއިން ވަކިކޮށްފައި ވަނީ ކުއްލި ގޮތަކަށް، އަދި އެއްވެސް ނަސޭޙަތެއް، އިންޒާރެއް އަދި ސަބަބެއް އެންގުމަކާ ނުލާ އަދި ވަޒީފާ އިން ވަކި ކުރުމުގެ ކުރިން ފުރިހަމަ ކުރަން ޖެހޭ މަޥްލޫޢީ އަދި އިޖުރާޢީ އަދުލުވެރިކަން ޤާއިމް ނުކޮށް، ޖަވާބުދާރީވާން ފުރުޞަތު ނުދީކަމަށް މި ޝަރީޢަތުގެ މަޖުލިހުގައި މޫސާ ނަސީމް ވަނީ ވިދާޅުވެފައެވެ.
ވަޒީފާއިން ވަކިކުރި ސިޓީގައި ޙަވާލާ ދެއްވާފައިވަނީ ޑިރެކްޓަރުންގެ ބޯޑުގެ އޮޑިޓް ކޮމިޓީން އެބޭފުޅާގެ އިތުބާރު ގެއްލިއްޖެ ކަމަށް ނިންމާފައިވާ ރިޕޯޓަކަށް ކަމަށާއި، ވަޒީފާއިން ވަކިކުރި އިރު، އެމް.ޑަބުލިޔޫ.އެސް.ސީގެ އެއިރުގެ މެނޭޖިން ޑައިރެކްޓަރ އާދަމް ޢާޒިމް، މި ރިޕޯޓް މޫސާ ނަސީމަށް ދެއްކުމަށް ވެސް އިންކާރުކޮށްފައިވާކަމަށް ވިދާޅުވިއެވެ. 7 ޖުލައިގައި ބޭއްވުނު ޝަރީޢަތުގެ މަޖުލިހަކީ މަޢުލޫމާތު ހޯދުމާއި ލިބިގަތުމުގެ ޤާނޫނުން ލިބިދޭ ހައްޤުގެ ދަށުން މި ރިޕޯޓް ހޯދުމަށް އިންފޮމޭޝަން ކަމިޝަނަރަށް މޫސާ ނަސީމް ހުށައެޅުއްވި ދަޢުވާގެ ޝަރީޢަތުގެ މަޖުލިހެވެ.
އިންފޮމޭޝަން ކޮމިޝަނަރުގެ އޮފީހުން ވަނީ މިއަޑުއެހުން ޢާއްމު ކޮށްފައެވެ. މޫސާ ނަސީމް ''ދެން''އަށް ވިދާޅުވީ އެމް.ޑަބުލިޔޫ.އެސް.ސީ އަކީ އެބޭފުޅާ ވަރަށް ލޯބިވެވަޑައިގަންނަވާ ކުންފުންޏެއް ކަމަށާއި އޮޑިޓް ޕުރޮފެޝަނަށް ވަރަށް އިޙްތިރާމްކުރައްވާތީ އަދި މިމައްސަލައަކީ މިހާރުވެސް ޝަރުޢީ މަރުޙަލާގައި ކުރިޔަށްދާ މައްސަލައަކަށް ވާތީ އެއްވެސް މަޢުލޫމާތެއް މީޑިއާއަށް ދެއްވަން ބޭފުޅު ނޫންކަމަށެވެ.
މިފަދަ ބޮޑެތި ތުހުމަތު ތަކެއް އެމް.ޑަބުލިއޫ.އެސް.ސީގެ އޮޑިޓް ކޮމެޓީ އާއި ބައެއްޑިރެކްޓަރުންނަށް، އަދި އެއިރުގެ މެނޭޖިންގ ޑައިރެކްޓަރ އާދަމް އާޒިމްގެ މައްޗަށް ކުރިއިރު އާދަމް އާޒިމް ޖެނުއަރީ 2020 ގައި އެމް.ޓީ.ސީ.ސީ ގެ މެނޭޖިންގ ޑިރެކްޓަރުކަމަށް ބަދަލު ކުރިފަހުން އެކުންފުނީގެ ތެރެއިން ވެސް މިފަދަ ކޮރަޕްޝަނާއި މަޤާމުގެ ނުފޫޒް ބޭނުން ކުރުމާއި އެކުންފުނީގައި ތިބި ގިނަ ދުވަސްވީ ޤާބިލު ދިވެހިންތަކެއް ހަމަ މިފަދަ ކުއްލި ގޮތަކަށް ވަޒީފާއިން ވަކިކޮށް ފައިވެއެވެ.
Ads by STO
