މަންމަ އުޅުނު އަހަރެން އެބޯޓު ކޮށްލަން: ބާރްތީ
އިންޑިއާގެ މަޝްހޫރު ކޮމީޑިއަން، ބާރްތީ ސިންގް އަކީ ވަރަށް ގިނަ ބައެއްގެ ލޯބި ލިބިފައިވާ، ގިނަ ބަޔަކު ހެއްވާލުމުގެ ކުޅަދާނަކަން ވެސް ލިބިފައިވާ މީހެކެވެ.
ބާރުތީގެ މަޖާ މިޒާޖުގެ ސަބަބުން އޭނާއަކީ ދުވަހަކު ވެސް އެއްވެސް ކަމަކާއި މާޔޫސްވެދާނެ މީހެއް ކަމަކަށް ގިނަ މީހުން ޤަބޫލެއް ނުކުރެއެވެ.
ނަމަވެސް މިދިޔަ އަހަރު "ދަ ރާޖީވް ޚާންޑޭލްވާލް ޝޯ" ގައި ބާރްތީ ވަނީ އޭނާގެ ދިރިއުޅުމާއި ބެހޭގޮތުން ގިނަ މީހުންނަށް މީގެ ކުރިން ނޭނގޭ ވާހަކަތަކެއް ހިއްސާ ކޮށްފައެވެ.
އެގޮތުން ބާރްތީ ބުނީ އޭނާ މިދުނިޔެއަށް އައީ އޭނަގެ މަންމަ ބޭނުންވެގެނެއް ނޫން ކަމަށާއި، ބާރުތީ އެބޯޓު ކޮށްލެވޭތޯ އޭނަގެ މަންމަ ވަރަށް ގިނަ މަސައްކަތް ކުރި ކަމަށެވެ.
"އެއިރު އަހަރެންގެ މައިންބަފައިންގެ މާލީ ހާލަތު ވަރަށް ދަށް. ވަރަށް ދަތިހާލުގައި އުޅުނީ. އެހާލުގައި އުޅެނިކޮށް މަންމަ އިނީ އަހަންނަށް ބަލިވެކަން އެނގުމުން މަންމަ ވަރަށް ބޮޑަށް ދެރަވެ ހާސްވި ކަމަށް ބުނި. ދަރިއަކު ގެންގެޅެވޭނެ ފެންވަރު އެއިރު މަންމަމެންގެ ނެތީމަ. އެހެންވެ މަންމަ ބުނީ އަހަރެން އެބޯޓު ކޮށްލެވޭތޯ ވަރަށް ބޮޑަށް މަސައްކަތް ކުރިކަމަށް. އެގޮތުން ބުރަކޮށް މަސައްކަތް ކުރުމާއި، ދުވުމާއި ފުންމުމާއި ހިނގުން ފަދަ ކަންކަން ކުރިކަމަށާއި މާބަނޑު ދުވަސްވަރު ކައިގެން ނުވާނެ ބައެއް އެއްޗެހި ކެއި ކަމަށް ވެސް ބުނި. އެކަމަކު އަހަރެން އެބޯޓެއް ނުވި" ބާރްތީ ބުނެފައިވެއެވެ.
އެއިރު ބާރްތީ އެބޯޓް ކޮށްލަން އޭނަގެ މަންމަ ބޭނުންވިޔަސް، މިހާރު އޭނަގެ މަންމަ އޭނައާއިމެދު ފަޚުރުވެރިވާ ކަމަށާއި އޭނަގެ މަސައްކަތަށް ވެސް ވަރަށް ބޮޑަށް ހިތްވަރުދޭ ކަމަށް ބާރްތީ ބުންޏެވެ.
