ބަޗަން އާއިލާއަށް ހިތާމަ، އަބީޝޭކް ވެސް ކޮވިޑް އަށް ފައްސި!
ބޮލީވުޑްގެ މަޝްހޫރު ފިލްމީތަރި އަމީތާބް ބަޗަން ކޮވިޑް-19 އަށް ފައްސިވެފައިވާކަން މީގެ އިރުކޮޅެއް ކުރިން މިރޭ އިއުލާނު ކޮށްފައިވާއިރު، އޭނާގެ ދަރި އަބީޝޭކް ބަޗަން ވެސް މިބައްޔަށް ފައްސިވެފައިވާކަން ހާމަވެއްޖެއެވެ.
ނާނާވަތީ ހޮސްޕިޓަލުގައި އަމީތާބު އެނދުމަތި ކޮށްފައިވާއިރު، އަބީޝޭކް ވެސް މިހާރު ވަނީ އެނދުމަތި ކޮށްފައި ކަމަށް ރިޕޯޓުތަކުން ބުނެފައިވެއެވެ.
އަބީޝޭކް ވެސް ކޮވިޑް އަށް ފައްސިވެފައިވާކަން ޓްވިޓާގައި ހާމަކުރަމުން ބުނެފައިވަނީ، ކޮވިޑްގެ އަލާމާތްތަކެއް އޭނައާއި އަމީތާބުގެ ހުރުމުންް ޓެސްޓު ކުރި ކަމަށާއި ބައްޔަށް ދެބަފައިން ވެސް ފައްސި ވެފައިވާ ކަމަށެވެ. އަދި އެދެމީހުން ވެސް މިހާރު އެޑްމިޓު ކުރެވިފައިވާއިރު، އެމީހުންނާއި އެންމެ ގާތްކޮށް އުޅުނު އެންމެން ވެސް މިހާރު ޓެސްޓު ކުރަމުން އަންނަ ކަމަށް ވެސް އަބީޝޭކް ބުނެފައިވެއެވެ.
އަބީޝޭކް ބުނެފައިވަނީ އެކަކު ވެސް އެހާ ހާސް ނުވުމަށާއި ހެޔޮ ދުޢާ ކުރުމަށެވެ.
