ކުޑަފަރިން މާލެ ގެނައި މީހަކު ކޮވިޑަށް ފައްސިވެއްޖެ
ނ. ކުޑަފަރިން މާލެ ގެނައި މީހަކު ކޮވިޑަށް ފައްސިވެއްޖެއެވެ.
ކުޑަފަރީ ކައުންސިލްގެ ރައީސް ހަސަން މުހައްމަދުއާ ހަވާލާދީ "ވަން" އޮންލައިންގައި ރިޕޯޓުކޮށްފައިވާ ގޮތުގައި 92 އަހަރުގެ އެ ފިރިހެން މީހާ މާލެ ގެނެސްފައިވަނީ އިއްޔެއެވެ.
އެ މީހާ މާލެ ގެނައީ ފާހާނައިން ނުކުންނަނިކޮށް ވެއްޓި އަނިޔާވެގެން، ނ. މަނަދޫ ހޮސްޕިޓަލަށް ގެންދިއުމަށްފަހު އެތަނުން ހެދި ސްކޭންތަކުން އޭނާގެ ފައި ބިނދިފައިވާ ކަމަށް ބުނުމުން ކަމަށް ހަސަން މުހައްމަދު ވިދާޅުވިއެވެ.
އޭނާ މާލެ ގެނެސް ހެދި ފުރަތަމަ ޓެސްޓް ކޮވިޑަށް ފައްސިވުމުން، ދެވަނަ ސާމްޕަލެއް ނަގައި ޓެސްޓު ކުރުމަށް ވަނީ ނިންމާފައެވެ.
ކުޑަފަރިން މާލެ ގެނައި މީހަކު ފައްސިވެފައިވާއިރު، ދުވާފަރުން ހޯމް ކަރަންޓީނުން ދޫކޮށްލި ތިން މީހަކު ކޮވިޑަށް ފައްސިވެ ރަށުގެ ގިނަ ބަޔަކަށް ބަލި ޖެހިފައިވާކަމުގެ ބިރު އޮތުމުން އެރަށަށް އަރައި ފޭބުން މަނާކޮށްފިއެވެ.
