ހުޅުދުއްފާރުން ފައްސިވި މީހާގެ ކޮންޓެކްޓެއް ނެތް: އަމަލު ކުރީ އެޗްޕީއޭ ގެ އިރުޝާދަށް
ރ. ހުޅުދުއްފާރުން މިއަދު ކޮވިޑަށް ފައްސިވެފައިވާ މީހާ އެރަށުން އެއްވެސް މީހަކާއި ބައްދަލުވެފައި ނުވާނެ ކަމަށް އޭނާ ބުނެފިއެވެ.
އޭނާ މިހެން ބުނެފައިވަނީ މިއަދު އޭނާގެ ފޭސްބުކުގައި ކުރި ޕޯސްޓެއްގައެވެ.
އެގޮތުން އޭނާގެ ޕޯސްޓުގައި ވަނީ ކޮވިޑު ޓެސްޓުގެ ނަތީޖާ ފައްސިވެފައިވާ ކަން ކަށަވަރު ކޮށްދީފައެވެ. ކޮވިޑަށް ފައްސިވި ނަމަވެސް ގަދަވެ ސަލާމަތުން އެއްވެސް އުނދަގުލެއް ނެތް ކަމަށް ވެސް އޭނާ ބުނެފައިވެއެވެ.
"އަޅުގަނޑާމެދު ހާސްވެ ކަންބޮޑުވެ ނުލައްވާށެެވެ. ހުރިހާ ކަމެއް ވެސް އަޅުގަނޑަށް ހަމަ އާދައިގެ މަތިން ރަނގަޅެވެ." އޭނާގެ ޕޯސްޓުގައި ބުނެފައިވެއެވެ.
މީގެ އިތުރުން ވެސް އޭނާ ވަނީ އޭނާގެ ފަރާތުން ހުޅުދުއްފާރު ރައްޔިތުން ނުރައްކަލަކަށް ހުށަނޭޅޭނެކަމުގެ ޔަޤީންކަން ދީފައެވެ. އެގޮތުން އެންމެ ފުރަތަމަ ދުވަހުން ފެށިގެން ވެސް އެޗްޕީއޭގެ ހަރުކަށީ އިރުޝާދުތަކަށް ބޯލަނބާ ފައިވާނެ ކަމަށާއި އެރަށުގެ އޭނާ ގެ ސީދާވެސް އަދި ނުސީދާ ކޮންޓެކްޓެއް ވެސް ނުހުންނާނެ ކަން އޭނާ ފާހަގަކޮށްފައިވެއެވެ.
މީގެ އިތުރުން އޭނާ ވަނީ ދުވާފަރުން ބަޔަކު ފައްސިވުމާއެކު، ރައްކާތެރިކަމުގެ ފިޔަވަޅުތަކަށް އިތުރަށް ސަމާލުވުމަށް އެ ރަށުގެ ރައްޔިތުންގެ ކިބައިން އެދިފައެވެ.
މި މީހާ ފައްސިވެފައިވަނީ ހުޅުދުއްފާރުގައި ހޯމް ކަރަންޓީނުގައި ހުއްޓައެވެ.
ރ. ދުވާފަަރުގައި ހޯމް ކަރަންޓީނުވުމަށް ފަހު ދޫކޮށްލި ބަޔަކު އިއްޔެ ވަނީ ކޮވިޑަށް ފައްސިވެފަ އެވެ. އެ މީހުން ދޫކޮށްލީ ފުރަތަމަ ކުރި ޓެސްޓުން އެ ބައްޔަށް ނައްސިވުމުންނެވެ. އެކަމަކު ދޫކޮށްލި ފަހުން ނެގި ސާމްޕަލް ފައްސިވުމުން އެ ރަށް މޮނިޓަރިންގެ ހާލަތަށް ގެނެސް، ކޮންޓެކްޓް ޓްރޭސިންގެ މަސައްކަތް އަންނަނީ ކުރަމުންނެވެ.
