ޖިންސީ ފުރައްސާރައިގެ ތުހުމަތު ކުރެވޭ ރައީސް އޮފީހުގެ ކޮމިއުނިކޭޝަންސް ޑިރެކްޓަރު ޕޮލިހަށް ހާޒިރުކޮށްފި
ރައީސް އޮފީހުގެ ކޮމިއުނިކޭޝަންސް ޑިރެކްޓަރު ހަސަން އިސްމާއިލްގެ މައްޗަށް ކުރެވޭ ޖިންސީ ފުރައްސާރައިގެ މައްސަލައާ ގުޅިގެން އޭނާ ފުލުސް އޮފީހަށް ހާޒިރު ކޮށްފިއެވެ.
ރައީސް އޮފީހުގެ ކޮމިއުނިކޭޝަން ޑިރެކްޓަރު ހަސަން އިސްމާއީލް އަށް މި ތުހުމަތުތައް ކުރަނީ "މިހާރު" ނޫހުގެ އިނގިރޭސި ވާޝަން "ދި އެޑިޝަން" ގައި މަސައްކަތް ކުރާ ނޫސްވެރިއެއްކަމަށްވާ ރާއީ މުނައްވަރެވެ. އޭނާ ވަނީ، ހަސަން އިސްމާއިލްގެ ޖިންސީ ފުރައްސާރައިގެ މައްސަލައެއް ރައީސް އޮފީހާއި، ފުލުސް އޮފީސް އަދި އޭސީސީ އަށް ހުށަހެޅި ކަމަށް ބުނެ ޓުވީޓުކޮށްފައެވެ.
ފުލުހުންގެ މީޑިއާ އޮފިޝަލު ވިދާޅުވީ ހަސަން އެ އިދާރާއަށް ހާޒިރުކުރީ ތަހުގީގު ކުރަމުން ދާ މައްސަލައަކާ ގުޅިގެން ކަމަށެވެ. ނަމަވެސް އެއީ ކޮން މައްސަލައެއްގައި ކަމެއް ފުލުހުން ނުބުނެއެވެ.
މިއަހަރުގެ ފެބްރުއަރީ މަހުގެ ހަތަރު ވަނަ ދުވަހު ރާއީ ހުށަހެޅި އެ މައްސަލައަށް މިއަދާއި ހަމައަށް އެއްވެސް ފިޔަވަޅެއް އަޅާފައި ނުވާއިރު، ރައީ ވަނީ މިދާދި ފަހުން އެ މައްސަލަ އަނެއްކާ ވެސް ފެންމަތި ކުރުވާފައެވެ. އެގޮތުން ހަސަން އިސްލާއިލްގެ މައްޗަށް ފިޔަވަޅު ނޭޅިވަނީ ކީއްވެތޯ ރާއީ ޓްވީޓް ކުރެއްވުމުން ޕޮލިސް ކޮމިޝަނަރ މުހައްމަދު ހަމީދު ވަނީ ފުލުހުންގެ ޓީމާ ސުވާލު ކުރުމުން އެ މައްސަލަ ތަހުގީގު ކުރަމުންދާ ކަމަށް ބުނެފައިވާ ކަމަށް ވިދާޅުވެފައެވެ. އަދި އެ މައްސަލައިގެ ތަހުގީގު އަވަސްކޮށް ދެއްވުމަށް ސީޕީ ހަމީދު އެދިވަޑައިގެންފައިވާނެ ކަމަށް ވިދާޅުވިއެވެ.
