މިއަދު އެކަނިވެސް 52 ދިވެހިން ކޮވިޑަށް ފައްސިވެ، ބިރުވެރިކަން ބޮޑުވެއްޖެ
މިއަދު ކޮވިޑް-19 އަށް ފައްސިވި މީހުންގެ ތެރޭގައި 52 ދިވެހިން ހިމެނި، ބަލީގެ ބިރުވެރިކަން ބޮޑުވެއްޖެއެވެ.
ހެލްތު ޕްރޮޓެކްޝަން އެޖެންސީ(އެޗްޕީއޭ) އިން ބުނީ މިއަދު ފައްސިވި 67 މީހުންގެ ތެރޭގައި ހިމެނެނީ 52 ދިވެހިންނާއި، ބަންގްލަދޭޝްގެ 14 މީހަކާއި އިންޑިއާ މީހެއް ކަމަށެވެ.
މި 67 މީހުންނާއެކު މި ބައްޔަށް ރާއްޖެއިން ފައްސިވި މީހުންގެ އަދަދު މިހާރު ވަނީ 2731 އަށް އަރާފައެވެ. މީގެތެރެއިން ފަރުވާ ދެމުން މިހާރު އަންނަނީ 419 މީހަކަށެވެ.
މިއީ މާލޭގެ ލޮކްޑައުންނަށް ލުއިދިން ފަހުން އެންމެ ގިނަ މީހުން ފައްސިވި ދުވަހެވެ. އަދި ފައްސިވާ މީހުންގެ އަދަދު ދުވަހެއް ދުވަހަކަށް އިތުރުވަމުންއަންނަ އިރު، ބަލި ޖެހޭ ދިވެހިންގެ އަދަދުވެސް މިހާރު އަންނަނީ އާދަޔާ ހިލާފަށް އިތުރުވަމުންނެވެ.
މިއަދު އިތުރު 16 މީހަކު ބަލިން ރަނގަޅުވެފައިވާއިރު، ބަލިން ރަނގަޅުވި މީހުންގެ ޖުމްލަ އަދަދު ވަނީ 2284 އަށް އަރާފައެވެ.
ރާއްޖެއިން ކޮވިޑް ޖެހިގެން މިހާތަނަށް ނިޔާވެފައި ވަނީ 13 މީހެކެވެ. އޭގެ ތެރޭގައި ހިމެނެނީ ހަތް ދިވެހީންނާއި، ހަ ބިދޭސީންނެވެ.
