ދުވާފަރުން 48 މީހެއްގެ ސާމްޕަލް ނަގައި، ފިޔަވަޅުތަކަށް ލުއިދީފި
ރ. ދުވާފަރުގައި ހޯމް ކަރަންޓީނުން ދޫކޮށްލި ތިން މީހަކު ކޮވިޑަށް ފައްސިވުމާ ގުޅިގެން އެމީހުންނާއި ސީދާ ބައްދަލުވި ކަމަށް ދެނެގަނެވުނު 48 މީހެއްގެ ސާމްޕަލް ނަގައި، ރަށުގައި އެޅި ރަށްކާތެރިކަމުގެ ފިޔަވަޅުތަކަށް ލުއި ދީފިއެވެ.
މާލެ އިން ދުވާފަރަށް މިދިޔަ މަހުގެ 19 ވަނަ ދުވަހު ގޮސް ހޯމް ކަރަންޓީނުގައި 14 ދުވަސް ހަމަކުރުމަށްފަހު ސާމްޕަލް ނައްސިވި ކަމަށް އެޗްޕީއޭ އިން އެންގުމުން މީގެ ދެ ދުވަސްކުރިން ދޫކޮށްލި ތިން މީހުން ފައްސިވެފައިވާ ކަމަށް އެޗްޕީއޭ އިން ވަނީ ބުނެފައެވެ.
މިއާއެކު އެޗްޕީއޭއިން ދުވާފަރު މޮނިޓަރިންގެ ހާލަތަށް ގެނައުމުން، ބަލިޖެހުނު މީހުންނާއި ސީދާ ބައްދަލުވި މީހުން ދެނެގަނެވެންދެން ރަށުގައި އާންމުކޮށް އެއްވެ އުޅުމާއި، ހޮޓާ މެދުކަނޑާލުމާއި އަދި މިސްކިތުގައި ޖަމާއަތް ހަދައިގެން ނަމާދު ކުރުން މަނާކުރެވުނު ކަމަށެވެ.
ނަމަވެސް ރޭގެ 19:10 ގައި ކޮންޓެކްޓް ޓްރޭސިންގގެ މަސައްކަތް ނިމިފައިވާކަމަށް އެޗްޕީއޭ އިން އެ ކައުންސިލަށް އަންގާފައިވާތީ، މިސްކިތްތަކުގައި ޖަމާއަތުގައި ނަމާދުކުރުމާއި، ކުޅިވަރުކުޅުމާއި، ފިހާރަތަކާއި، ކެފޭ ރެސްޓޯރަންޓްތަކުގެ ޚިދުމަތް އާންމު އުސޫލުން ދިނުމަށް ހުޅުވާލެވިފައިވާ ވާކަމަށް އެ ކައުންސިލުން ވަނީ ބުނެފައެވެ.
އެ ރަށުން ތިން މީހަކު ކޯވިޑަށް ފައްސިވުމާއި ގުޅިގެން ގުޅިގެން ކުރިއަށް ގެންދެވުނު ކޮންޓެކްޓް ޓްރޭސިންގެ ގައި ފާހަގަ ކުރެވޭ 48 މީހެއްގެ މަޢުލޫމާތު އިއްޔެ ހަވީރުގެ ވަގުތެއްގައި ނަގައި ނިންމައި، އެޗްޕީއޭ އާއި ހިއްސާކޮށްފައި ވާކަމަށް ދުވާފަރު ސިއްޙީ މަރުކަޒުން ވަނީ ރޭގައި ހާމަ ކޮށްފައެވެ.
