މިނިސްޓަރ އިމްރާން ޔޫއެންއޯޑީސީގެ އިސްވެރިޔާއާ ބައްދަލު ކުރައްވައިފި
ރާއްޖޭގައި ކުށްކުރުން މަދު ކުރުމާއި ޖިނާޢީ ޢަދުލުގެ ނިޒާމް ހަރުދަނާ ކުރުމުގެ ދާއިރާއިން ގުޅިގެން މަސައްކަތް ކުރުމަށް ޔޫއެންއޯޑީސީގެ އިސްފަރާތްތަކާއެކު މަޝްވަރާ ކޮށްފިއެވެ.
ހޯމް މިނިސްޓަރ އިމްރާން އަބްދުﷲ ވަނީ ޔޫއެންއޯޑީސީގެ އެގްޒެކެޓިވް ޑިރެކްޓަރ ގާދާ ވާލީއާ ބައްދަލު ކުރައްވައި ކުށް މަދު ކުރުމާއި، ޖިނާޢީ ޢަދުލުގެ ނިޒާމް ހަރުދަނާ ކުރުމަށް ގުޅިގެން މަސައްކަތް ކުރުމާއި ގުޅޭގޮތުން މަޝްވަރާ ކުރައްވާފައެވެ.
މީގެ އިތުރުން މިބައްދަލުވުމުގައި މިނިސްޓަރ އިމްރާން ވަނީ ރާއްޖެއާއި ޔޫއެންއޯޑީސީ ގުޅިގެން ކުރިއަށްގެންދާ ޖަލުތަކުގައި ހުރި މައްސަލަތައް ހައްލު ކުރުމުގެ މަސައްކަތާއި، ކުޑަކުދިންގެ ޢަދުލުގެ ނިޒާމް ހަރުދަނާ ކުރުމުގެ އިތުރުން ކަނޑުމަތީގެ ސަލާމަތާއި ރައްކާތެރިކަން ކަށަވަރު ކުރުމާއި ކައުންޓަރ ޓެރަރިޒަމްގެ ދާއިރާއިން ކުރެވޭ މަސައްކަތްތައް ފާހަގަ ކުރައްވައި، ކުރިއަށް އޮތް ތަނުގައި ވެސް ގުޅިގެން މަސައްކަތް ކުރުމުގެ މުހިއްމުކަން ފާހަގަ ކުރައްވާފައެވެ.
މީގެ އިތުރުން މިނިސްޓަރ އިމްރާން ވަނީ މިމަހުގެ 7 އިން 12އަށް ޖަޕާނުގެ ކިޔޯޓޯގައި ކުރިއަށްދާ 14 ވަނަ ޔުނައިޓެޑް ނޭޝަންސް ކޮންގްރެސް އޮން ކްރައިމް ޕްރިވެންޝަން އެންޑް ކްރިމިނަލް ޖަސްޓިސްގައި ވެސް ބައިވެރިވެވަޑައިގެންފައެވެ.
އެމަނިކުފާނުގެ އަރިހުގައި މި ދަތުރުފުޅުގައި، ކޮމިޝަނަރ އޮފް ޕޮލިސް މުޙައްމަދު ހަމީދުގެ އިތުރުން ހޯމް މިނިސްޓްރީގެ އިސްބައެއް ބޭފުޅުން ބައިވެރިވެވަޑައިގަންނަވައެވެ.
