މިނިސްޓަރު ފައްޔާޒު އެ ވިދާޅުވާ ސިޔާސީ ނުފޫޒު އަންނަނީ ވެރިކަމުގެ އެތެރެއިންބާ؟: ޣައްސާން
ބިދޭސީން ލައްވާ މުޒާހަރާ ކުރުވުމުގައި ސިޔާސީ ބަޔަކު ވެސް ތިބޭ ކަމަށް އިކޮނޮމިކް މިނިސްޓަރު ފައްޔާޒް އިސްމާއީލް މިއަދު ތުހުމަތު ކުރެއްވުމުން އިދިކޮޅު ޕީޕީއެމްގެ ނައިބް ރައީސް އަދި ތ. ގުރައިދޫ ދާއިރާގެ މެމްބަރު ޣައްސާން މައުމޫން ރައްދު ދެއްވައިފިއެވެ.
ބިދޭސީންގެ މައްސަލައަށް އަވަސް ހައްލެއް ހޯދަން ރައްޔިތުންގެ މަޖިލީހަށް ހުށަހަޅާފައިވާ ކުއްލި މައްސަލައާ ގުޅިގެން މަޖިލީހަށް ވަޑައިގެން ވާހަކަދައްކަވަމުން މިނިސްޓަރު ފައްޔާޒު ވިދާޅުވީ ސިޔާސީ މަގުސަދެއް ހާސިލުކުރުމަށް ބިދޭސީން ބޭނުންކޮށްގެން މުޒާހަރާ ކުރާކަމީ އެނގޭ ހަގީގަތެއް ކަމަށެވެ.
މިކަމަށް ރައްދު ދެއްވައި ޣައްސާން ކުރެއްވި ޓްވީޓެއްގައި ވިދާޅުވީ ޕީޕީއެމް އަކީ ގައުމު ބިނާކުރާ ފިކުރު ކަމަށާއި ގައުމީ ސަލާމަތަށް ނުރައްކާވާ އިގްތިސާދު ހީނަރުވާ، ރައްޔިތުންނަށް ގެއްލުންވާ ކަމެއް މި ކޯލިޝަނަކުން ނުކުރާނެ ކަމަށެވެ.
"އެ ވިދާޅުވާ ސިޔާސީ ނުފޫޒު އަންނަނީ ވެރިކަމުގެ އެތެރެއިންބާ؟" ޣައްސާން ސުވާލު ކުރެއްވިއެވެ.
PPM akee gaumu binaa kuraa fikuru. Gaumee salaamathah nurakkavaa, iqthisaadh heenaru vaa, rayyithunnah gellunvaa kameh mi coalition akun nukuraane. E vidhaalhu vaa siyaasee nufoozu annanee verikamuge etherein baa? https://t.co/hJVND1v6CZ
— Mohamed Ghassan Maumoon (@mgmaumoon) July 13, 2020
މިނިސްޓަރު ފައްޔާޒު މިއަދު ވިދާޅުވީ އެމަނިކުފާނު އެ އިނގިލި ދިއްކުރަނީ އިދިކޮޅު ފަރާތްތަކަކަށް ނޫން ކަމަށާއި އިދިކޮޅު ފަރާތްތައް ނޫނަސް ސިޔާސީ ބޭނުމަށް ކަންކަން ކުރާ މީހުން ތިބޭ ކަމަށެވެ.
އަދި މިހާރަކަށް އައިސް ބިދޭސީން ކުރާ މުޒާހަރާތަކަކީ ރާއްޖެއަށް ހަލަބޮލިކަން ގެނައުމަށްޓަކާ ސިޔާސީ ބަޔަކު ކުރާ މަސައްކަތްތަކަމަށް ޝައްކު ކުރެވޭ ކަމަށް ފައްޔާޒު ވިދާޅުވިއެވެ.
