ހަަމައެކަނި ދޮންބަންޑާރައިން ނޫނަސް ކޮންމެ މީހަކުވެސް މަސައްކަތް ކުރާނީ ދިވެހީންގެ ޙައްޤުގައި: ރައީސް ނަޝީދު
ހަމައެކަނި ދޮންބަންޑާރައިން ނޫނަސް ވެސް އަދި ރާއްޖޭގެ ރައްޔިތުންގެ މައްޗަށް ރައްޔިތުން ކަނޑައެޅި ކޮންމެ މީހަކު ވެސް މަސައްކަތްތަކެއް ކުރާނީ ދިވެހީންގެ ޙައްޤުގައި، ދިވެހީންގެ ކުރިއެރުމަށް ކަމަަަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އިންޑިއާ ސަރުކާރުން ރާއްޖެއަށް 61 އައުޓްޑޯ ޖިމް ހަދިޔާކުރުމުގެ ގޮތުން މިއަދު ހަވީރު ގަނލޮޅު ދަނޑުގައި ބޭއްވި ރަސްމިއްޔާތެއްގައި އިންޑިއާއާއި ރާއްޖޭގެ ގާތްކަމާއި ގުޅޭގޮތުން ވާހަކަފުޅު ދައްކަވަމުން ރައީސް ނަޝީދު ވިދާޅުވީ ދޮންބަންޑާރައިން ނޫނަސް ވެސް އަދި ރާއްޖޭގެ ރައްޔިތުންގެ މައްޗަށް ރައްޔިތުން ކަނޑައެޅި ކޮންމެ މީހަކު ވެސް މަސައްކަތްތަކެއް ކުރާނީ ދިވެހީންގެ ޙައްޤުގައި، ދިވެހީންގެ ކުރިއެރުމަށް ކަމަށް އެމަނިކުފާނަށް ޔަގީން ކަށަވަރު ކުރެވޭ ކަމަށެވެ.
"އެކުރިއެރުވުން ހޯދަން އަޅުގަނޑުމެންނަށް ލިބިފައިވާ އެންމެ ބޮޑު ނަސީބަކީ އިންޑިއާއަކީ އަޅުގަނޑުމެންގެ އަވަށްޓެރިއަކަށްވުން. އެމީހުން އެދަނީ ތަނަވަސްވަމުން. އެމީހުންނާއިއެކީގައި އަޅުގަނޑުމެންނަށް ވެސް ތަނަވަސް ވެވޭނެ." ރައީސް ނަޝީދު ވިދާޅުވިއެވެ.
މީގެއިތުރުން ރައީސް ނަޝީދު ވިދާޅުވީ ދިވެހިންނާއި އިންޑިއާއި އާއި އޮތް ގުޅުމުން ދިވެހިންނަށް އެންމެ ސާފުވެފައި އޮތް އެއް ހަގީގަތަކީ ދިވެހިންގެ މިނިވަންކަން ހަގީގަތުގައި ދެމެހެއްޓެން އޮތް އެންމެ ބުއްދިވެރި ގޮތަކީ އިންޑިއާ އާއި އެކީގައި ދިވެހިން ވެސް ވިސްނަމުން ކަންކަން ކުރަމުން ދިޔުންކަމަށެވެ.
"އަޅުގަނޑުމެންނަށް އެބަ އިނގޭ އަޅުގަނޑުމެންގެ ރާއްޖޭގެ ރައްޔިތުން އެދި ގޮވަނީ އާއްމު ހާލަތު ރަނގަޅުވުމަށްކަން، ޖީބަށް އެއްޗެއް ވަނުމަށްކަން، ވަޒީފާއެއްގެ ފުރުސަތު ލިބުންކަން، ބޯހިޔާވަހިކަމެއް ލިބުންކަން. އަމިއްލަ ސިއްޙަތު ރަނގަޅަށް އޮތުންކަން ދަރިންނަށް ކިޔަވާ ދެވުންކަން.
އަޅުގަނޑުމެންނަށް އެބަ ސާފުވޭ ރާއްޖޭގެ ރައްޔިތުން އަބަދުމެ އެއާދޭސް ކުރަނީ އެމީހުންނަށް އެމީހުންނަށް ތަނަވަސް ދިރިއުޅުމެއް ހޯދައިދިނުމަށްކަން.
އަޅުގަނޑުމެންނަށް އިންޑިއާ ކަނޑުގައިވެސް އަދި ދުނިޔޭގައި ވެސް މަގާމެއް ހޯދޭނެ. އެމަގާމަކީ އަޅުގަނޑު ދެކޭ ގޮތުގައި އިންޑިއާ އާއި ޖަދަލުކޮށް ނުވަތަ ބޮޑާހޭކުމުގެ ރޫހެއްގައި، ފޫހިވާގޮތުގެ ރޫހެއްގައި ހޭދަކޮށްފިނަމަ އަޅުގަނޑުމެންނަށް މިދެންނެވި އުޖާލާ މަންޒަރު ހޯދަން ދަތިވާނެ" ރައީސް ނަޝީދު ވިދާޅުވެފައިވެއެވެ.
