އީވާގެ އިންޒާރު ޑރ. އިޔާޒަށް: ހަބަރުދާރު! ދީނުގެ ނަމުގައި ފުރައްސާރަ ކުރަން ޖާގައެއް ނުދޭނަން
ޖިންސީ ގޯނާއިން ރައްކާތެރިވުމަށް ދީނުގައި އަންގަވާފައިވާ ގޮތަށް އަންހެނުން އަމަލުކުރުމަށް އެދި ޑރ. މުހައްމަދު އިޔާޒް ކުރެއްވި ޓުވީޓަކާ ގުޅިގެން، ރައްޔިތުންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު، އީވާ އަބްދުﷲ ވަރުގަދަ ބަހުގެ ހަމަލާތަކެއް ރައްދުކުރައްވައިފި އެވެ.
ޖިންސީ ކުށުގެ ގާނޫނަށް ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް ހުށަހެޅުއްވި އިސްލާހުގެ ބިލަށް ބަހުސް ކުރައްވަމުން ގަލޮޅު ދެކުނު ދާއިރާގެ މެންބަރު އީވާ ވިދާޅުވީ، އިސްލާމް ދީނުގެ ނަމުގައި ޖިންސީ ފުރައްސާރަ އަށާއި ގޯނާއަށް ހިތްވަރު ލިބޭ ގޮތަށް ބައެއް ދީނީ އިލްމުވެރިންނާއި މީޑިއާގައި ވާހަކަ ދައްކަމުން ގެންދާ ކަމަށާއި ރައްޔިތުންގެ މަޖިލީހުގެ މެންބަރެއްގެ ގޮތުގައި ހުންނަވާ ހިނދަކު އެ ފުރުސަތެއް ނުދެއްވާނެކަމަށެވެ.
އަދި ޖިންސީ ކުށްތަކުގެ ޝިކާރައަށް އަންހެން ކުއްޖަކު ދަނީ އެއް ގޮތަކަށް ވެސް އޭނާ ލައިގެން ހުންނަ ހެދުމެއްގެ ސަބަބަކުން ނޫންކަން އީވާ ފާހަގަކުރެއްވިއެވެ.
"ޓުވިޓާ ހޭންޑަލްގެ ކުރިއަށް ޑޮކްޓަރު ޖަހާލާފައި، ޓީވީއަށް އަރާ އިނދެ ޝެއިޚް ކިޔާލާފައި މި ލިޔެލަނީ އަންހެން މީހާ އައުރަ ނިވާ ވީމާ ޖިންސީ އަނިޔާއެއް ނުހިނގާނޭ. މިހެން މި ލިޔެލަނީ. މީ މުޑުދާރު ވާހަކައެއް. މީ މުޑުދާރު ވާހަކައެއް،" އީވާ ވިދާޅުވި އެވެ.
އީވާ އިތުރަށް ވިދާޅުވީ މިފަދައިން އަންހެނުން ލާ އެއްޗެއްގެ ސަބަބުން ނުވަތަ ދާ ތަނެއްގެ ސަބަބުން ކަމަށް ބުނެ ޖިންސީ އަނިޔާ ކުރާ މީހުން ކުށުން ބަރީއަކުރުމަކީ އުމުގައި ޖިންސީ އަނިޔާއަށް ކަނޑައެޅިގެން ހިތްވަރު ދިނުން ކަމަށެވެ. އަދި އެކަން އެގޮތަށް ދެކުމަކީ ލާއިންސާނީ ކަމެއްގެ ގޮތުގައި އީވާ ފާހަގަކުރެއްވިއެވެ.
"ހަ މަހުގެ ކުޑަ ކުއްޖަކު މި ރޭޕް ކުރަނީ ކޮން އެއްޗެއް ލައިގެން ހުރީމަ، ބައްޕައަކު އަމިއްލަ ދަރިއަކު ރޭޕް މި ކުރަނީ އޭނާ ކޮން އެއްޗެއް ލައިގެން ހުރީމަ، މިއީ ރޭޕަށާއި ޖިންސީ ގޯނާއަށް ހިތްވަރު ދޭން ވެގެން، އަންހެނުންނަށް ގަދަރުކުޑަ ކުރަން ދައްކާ ވާހަކައެއް،" އީވާ އިތުރަށް ވިދާޅުވިއެވެ.
އެހެންކަމުން މިއީ ވަހުޝީ ވާހަކަ ދައްކައިގެން މުޖުތަމައު ތެރޭގައި އަނިޔާވެރިކަން އިތުރުކޮށް، އަންހެނުންނަށް އޮތް ގަދަރު ކުޑަ ކުރަން ދައްކާ ވާހަކަ ކަމަށް އީވާ ވިދާޅުވިއެވެ.
