ފޮނަދޫ މަގު ހެދުމުގެ މަޝްރޫއުގެ 59 ޕަސެންޓް ނިމިއްޖެ
ލ. ފޮނަދޫ މަގު ހެދުމުގެ މަޝްރޫޢުގެ 59 ޕަސެންޓް މަސައްކަތް ނިމިއްޖެއެވެ.
އެ މަސައްކަތް ކުރަމުންދާ އެމްޓީސީސީން ބުނީ ފޮނަދޫ މަގުތައް ހެދުމުގެ މަޝްރޫޢުގެ 59 ޕަސެންޓު ނިމިފައިވާ ކަމަށާއި މި މަޝްރޫޢުގެ ތެރެއިން މަގުގައި ހުރި ގާތައް ނެގުުމުގެ މަސައްކަތާއި މަގު އެއްވަރުކުރުމާއި އަދި ސަބް ގްރޭޑިންގް މަސައްކަތް މިހާރު ކުރިއަށްދާ ކަމަށެވެ.
މި މަޝްރޫޢުގެ ދަށުން ފޮނަދޫގެ 12 މަގެއްގައި 27,848 އަކަ މީޓަރު ތާރު އެޅުމަށް ވަނީ ހަމަޖެހިފައެވެ. މިއީ 3.5 ކިލޯ މީޓަރު ސަރަހައްދެކެވެ.
މި މަސައްކަތުގެ ދަށުން ރަށުގައި ސްޓޯމް ވޯޓާ މެނޭޖްމަންޓް ސިސްޓަމެއް ގާއިމްކޮށް ފެންބޮޑުވުމުގެ މައްސަލައަށް ހައްލެއް ގެނެވޭނެ ކަމަށާއި އަދި މަގުމަތީގެ ނިޝާންތައް ފާހަގަކޮށް ސްޕީޑު ބްރޭކަރުތައް ހަރުކުރުމުގެ މަސައްކަތްވެސް ކުރުމަށް ހަމަޖެހިފައިވާ ކަމަށް އެމްޓީސީސީން ބުނެއެވެ.
އެމްޓީސީސީއާ މި މަޝްރޫއު ހަވާލުކޮށްފައިވަނީ 25.5 މިލިއަން ރުފިޔާ އަށެވެ. މި މަޝްރޫޢުގެ އަމަލީ މަސައްކަތް ފަށާފައިވަނީ 2019 ޖޫން 26 ގައެވެ.
