އިޔާޒުގެ ރައްދު އީވާއަށް: މަޖިލީހުގެ ގޮނޑިއެއް ލިބުމަކީ ސައިޒު އޮޅެންޖެހޭ ކަމެއް ނޫން!
ރައްޔިތުންގެ މަޖިލީހުގެ ގޮނޑިއެއް ލިބުމަކީ މީހާގެ ސައިޒު އޮޅެންޖެހޭ ކަމެއް ނޫން ކަމެއް ކަމަށް ވިދާޅުވެ ޑރ. މުހައްމަދު އިޔާޒު، ގަލޮޅު އުތުރު ދާއިރާގެ މެމްބަރު އީވާ އަބްދުﷲ އަށް ރައްދު ދެއްވައިފިއެވެ.
އިޔާޒު މިހެން ވިދާޅުވީ މަޖިލީހުގެ މިއަދުގެ ޖަލްސާގައި އީވާ އިޔާޒުއަށް ވަރުގަދަ ބަހުގެ ހަމަލާތަކެއް ފޮނުވާލުމާ ގުޅިގެންނެވެ.
އެގޮތުން މަޖިލީހުގެ މިއަދުގެ ޖަލްސާގައި ވާހަކަދައްކަވަމުން އީވާ ވަނީ ފާހިޝް އަމަލުތަކަށް މަގުފަހިވާ ދޮރުތައް ބަންދުކުރުމަށް އަންހެން މީހާ ލާ ހެދުން ބަދަލުކުރަންޖެހޭ ކަމަށް ބުނުމަކީ މުޑުދާރު ވާހަކައެއް ކަމަށާއި އިޔާޒު މެންފަދަ ބޭފުޅުން މިހާރު ދަނީ އިސްލާމްދީން އަސްލު ދަންނަ ބޭކަލުންނަށް ހުތުރު އަރުވަމުން ކަމަށެވެ.
އީވާ އިޔާޒަށް ފާޑު ވިދާޅުވީ ޖިންސީ ފުރައްސާރައިން ރައްކާތެރިވާން އައުރަ ނިވާކޮށް، މަހުރަމަކާ އެކީ ދަތުރު ކުރުމަށް ގޮވާލާއި އޭނާ ކުރެއްވި ޓްވީޓަކާ ގުޅިގެންނެވެ.
އީވާގެ ވާހަކަފުޅަށް ރައްދު ދެއްވައި، އިޔާޒު ވިދާޅުވީ އިސްލާމް ދީނުގައި އަންހެނުންނަށް ދެވިފައިވާ ހިމާޔަތަށް ވުރެ ބޮޑު ހިމާޔަތެއް އެހެން އެއްވެސް ދީނަކަށް އަދި އެއްވެސް ބަޔަކަށް ވެސް ނުދެވޭނެކަން ހަނދާނުގައި ބަހައްޓަން ޖެހޭ ކަމަށެވެ. އަދި މީހަކު ކިތަންމެ ރުޅިއައި ނަމަވެސް، ކިތަންމެ ވަރުގަދަ އިންޒާރެއް ދިން ނަމަވެސް، ކިތަންމެ ބޮޑު އަނިޔާއެއް ދިން ނަމަވެސް، ދީނުގައި ކަން އޮންނަ ގޮތް ރައްޔިތުންނަށް ބަޔާންކޮށް ދިނުމުގައި އެންމެ ތަންކޮޅެއް ވެސް ފަހަތަކަށް ނުޖެހޭނެ ކަމަށް އޭނާ ވިދާޅުވި އެވެ.
"މަޖިލީހުގެ ގޮނޑި އަށް ލިބުމަކީ މީހާ ސައިޒު އޮޅެންޖެހޭ ވަރުގެ ކަމެއް ނޫން" އީވާ އަށް އަމާޒުކޮށް އިޔާޒު ވިދާޅުވިއެވެ.
Islam Dheenugai Anhenunnah dhevvaafaivaa himaayathah vure bodu himaayathe ehen evves dheenakah adhi evves bayakah nudheveyne kan handhaanugai bahattan jeheyne. @evattey . @mvpeoplesmajlis ge gondi eh libumakee meeha size olhen jehey varuge kameh noon.
— Dr Mohamed Iyaz (@dr_iyaz) July 14, 2020
ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވެސް ވަނީ ޑރ. އިޔާޒުގެ ދިފާއުގައި ވާހަކަ ދައްކަވާފައެވެ.
އެގޮތުން ޝަހީމް ކުރެއްވި ޓްވީޓެއްގައި ވިދާޅުވީ ފިގުހީ ބައެއް ކަންކަމުގައްޔާއި ސިޔާސީ ކަންކަމުގައި ޚިޔާލު ތަފާތު ވިޔަސް، ޑރ އިޔާޒް، އަންހެނުންނަށް ޖިންސީ ގޯނާކުރުމަށް ބާރުއަޅާފަ ވާހަކަ ނުދައްކަވާނެކަން އޭނާ އަށް ޔަގީންވާ ކަމަށެވެ. އަދި ރައްޔިތުންގެ މަޖްލީހުން ދީނީ ޢިލްމުވެރިންގެ އަބުރު ކަތިލުން ހުއްޓާލަންޖެހޭ ކަމަށް އޭނާ ވިދާޅުވިއެވެ.
