އަދީބު ފުރުން މަނާ ކުރަނީ!
ކުރީގެ ނައިބު ރައީސް އަހުމަދު އަދީބު ރާއްޖެއިން ފުރުން މަނާ ކުރުމުގެ މަސައްކަތް ކުރަމުން އެބަދެއެވެ.
ޕީޖީ އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުން ޕީޖީ ޙުސެއިން ޝަމީމް ވިދާޅުވީ ބޯޑަރު އޮތީ ބަންދު ކޮށްފައި ކަމަށާއި އެހެން ނަމަވެސް އަދީބު ފުރުން މަނާ ކުރުމުގެ އަމުރެއް ނެރުމަށް ފުލުހުންނަށް ދަންނަވާފައި ވާނެ ކަމަށެވެ.
"އަޅުގަނޑުމެން މިއަދު އެޕީލް އެބަ ކުރަން. ފުރުން މަނާ ކުރުމުގެ އަމުރަކަށް. އެޕްރޮސެސް އެބަ ހިނގާ." ޕީޖީ ޝަމީމް ވިދާޅުވިއެވެ.
ޕީޖީ ޝަމީމް ވިދާޅުވީ މާގިނައިރެއް ނުވެ އެއަމުރު ލިބޭނެކަމަށް ހީވެވަޑައިގަންނަވާ ކަމަށެވެ.
"އެވާގޮތަކީ އަދީބަކީ ފިލާފައި ހުރި މީހެއް. އެކަމުގެ ކުށުގެ ރިކޯޑެއް ވެސް އެބައޮތް. ހައިކޯޓުން ދާދިފަހުން ނިންމެވި ޤަޞިއްޔާއެއްގައި ހައިކޯޓުން އަމިއްލަފުޅަށް ނިންމަވާފައި އޮވޭ ފިލާފާނެ މީހެއް ކަމަށްވަންޏާ ޝަރީޢަތް ނިމެންދެން ބަންދު ކުރަން ޖެހޭކަމަށް. މިވަގުތު އޮތީ ހައިކޯޓުގެ ނިންމުން، އެނިންމުން ބުނާ ގޮތުން ފިލާފާނެ މީހެއް ކަމަށްވަންޏާ ބަންދު ކުރަން އެބަޖެހޭ." ޕީޖީ ޝަމީމް ވިދާޅުވިއެވެ.
